Për të tretin radhazi, tashmë në Tiranë, është zhvilluar takimi i përbashkët mes federatave sportive Shqipëri-Kosovë, që në fakt është bërë me ndërmjetësinë e Komitetit Olimpik Kombëtar Shqiptar. Duket si një formalitet, megjithëse është bërë rezymeja e të gjitha aktiviteteve të përbashkëta mes federatave, që në fakt nuk mungojnë prej më shumë se gati 15 vjetësh. Përkrah presidentit Bezhani ka qenë ai i Komitetit Olimpik të Kosovës, Besim Hasani.
Ndërsa zëvendësministri i Arsimit dhe i Sporteve, Rauf Dimraj, është takuar me drejtorin e Sportit në Ministrinë përkatëse në Kosovë, Ibër Alaj. Bezhani dhe Hasani kanë përshëndetur, ndërsa ky i fundit ka bërë përshkrimin e rrugëtimit të Kosovës si anëtare e IOC-së, duke shpresuar që të anëtarësohet plotësisht në Monako, në asamblenë e më 8 dhe 9 dhjetorit. Sakaq për Dimrajn është shumë i rëndësishëm ky promovim, i cili i jep rëndësi sportit.
“Nuk kanë mungesa të rezultateve, ndërsa është shumë e rëndësishme mbështetja e Turqisë për ju, – ka deklaruar funksionari i MAS-it. – Një bazë reale për ecurinë e sportit do të jetë krijimi i ekipeve zinxhir mbi baza të forta, si dhe ndërtimi i kuadrit të trajnerëve për rritjen e cilësisë së sportit”. Në emër të Federatës Shqiptare të Mundjes ka përshëndetur presidenti Martin Biba, ndërsa dy federatat e Taekuondosë kanë nënshkruar marrëveshjen e bashkëpunimit.
Ajo është firmosur nga zëvendëspresidenti Leo Kapri dhe Vilton Selmani për Kosovën. Komiteti Olimpik i Kosovës ka dhënë një mirënjohje për Viron Bezhanin për luftën për anëtarësimin e Kosovës në IOC-së, kurse gazetari i mirënjohur sportiv, Gani Kosumi ka dhuruar një libër për sportin e Kosovës për Viron Bezhanin. I gjithë ky takim është zhvilluar në mjediset e resortit “Te Stela” në kilometrin e 7-të të autostradës Tiranë-Durrës.
