ASNN – Presidenti i Komitetit Olimpik Ndërkombëtar (IOC), Tomas Bah, i ka dorëzuar të hënën mbrëma “Urdhërin Olimpik” për ish-presidentin e Komitetit Olimpik të Kosovës (KOK), Besim Hasani. “Urdhri Olimpik” është çmimi më i madh që jep organizmi që qeveris Lëvizjen Olimpike Ndërkombëtare. Ceremonia gjatë së cilës Hasani ka marrë çmimin e vyer është mbajtur në Lozanë të Zvicrës, në “Shtëpinë Olimpike”. Gjatë ceremonisë “IOC Golden Rings Awards” janë ndarë dy çmime “Urdhëri Olimpik”. Përveç Hasanit, ai i është dhënë edhe amerikanit Piter Dajamond, zëvendëspresident i NBC Olympics.
Ndikimi i Dajamondit në lëvizjen olimpike vlerësohet shumë i madh, teksa ai është pjesë e rëndësishme e transmetuesit “NBC Olympics”. Për lëvizjen olimpike, sidomos atë në Kosovë, me shumë peshë vlerësohet edhe Besim Hasani, që ishte në krye të KOK-ut nga viti 1996 e deri në mars të këtij viti. “Është një nder për mua që ta prezantoj të shpërblyerin e dytë me këtë çmim të rëndësishëm, – ka thënë duke folur në këtë ceremoni anëtar i rëndësishëm i IOC-së, Robin Mitçelli. Më tej, ai ka prezantuar profilin e Besim Hasanit në ceremoninë në Lozanë. “Besim Hasani është pionier dhe lider i madh sportiv”, – ka thënë Mitçell.
“Ai konsiderohet si personi që ia ka mundësuar Kosovës ta fitojë njohjen ndërkombëtare në sport, – ka vijuar zyrtari i IOC-së. – Për më shumë se 20 vjet ai ka luftuar për ëndrrën e tij. Falë angazhimit dhe vendosmërisë së tij, ëndrra e tij u realizua në dhjetor të vitit 2014, kur Komiteti Olimpik i Kosovës u pranua në IOC. Gjatë 6 vjetëve të tij si president i KOK-ut pas pranimit, ai punoi pa u lodhur për të promovuar sportin dhe lëvizjen olimpike në Kosovë. Kjo u shpërblye me paraqitjet e mira të sportistëve kosovarë në arenën ndërkombëtare disa vjet më vonë. Të gjithë e kujtojmë medaljen e parë të Kosovës në “Rio 2016, të fituar nga Majlinda Kelmendi.”
“Ishte medalja e parë e artë e Kosovës në paraqitjen e parë në Lojërat Olimpike, – ka vijuar Mitçelli. – Ky sukses u prit jashtëzakonisht mirë dhe me krenari në Kosovë, por më shumë se kaq, frymëzoi brezin e ri që të besojë në ëndrrën dhe të ardhmen. Hasani luajti rol lideri dhe e promovoi shpirtin olimpik në zemrat e njerëzve dhe të rinjve të Kosovës. Ai gjithashtu kualifikoi stafin ne menaxhmentin sportiv në Kosovë dhe lidershipi i tij e bëri Kosovën të njohur për punën e madhe edhe në IOC. Hasani ka qenë njeriu kryesor në promovimin e sportit të Kosovës.” Më pas fjalën e mori kreu i IOC-së, Tomas Bah, që lexoi edhe motivacioni e dhënies së këtij Urdhëri.
“Si mirënjohje për angazhimin e madh për sportin e Kosovës, të shpërblejë me Urdhërin Olimpik për punën e palodhshme dhe promovimin e sportit të Kosovës”, iu drejtua Bahut ish-presidentit të KOK-ut.
