Ndërkohë që është bërë një “rrokadë” me Malin e Zi, ndeshja e kthimit më 19 nëntor 2016 do të luhet në Shqipëri, atje ku zyrtarët e basketbollit shqiptar duhet të konfirmojnë Pallatin e Sportit. E kjo jo vetëm për Malin e Zi, që është ndeshja e fundit eliminatore në fushën tonë, por dhe përballjet me Britaninë e Madhe dhe Italinë. Tashmë tensioni mbi të gjitha tek drejtuesit tanë është tepër i lartë, së pari për përgatitjen maksimale të ekipit, i cili do të drejtohet nga trajneri i Tiranës, Erdal Borova, e së dyti për plotësimin e infrastrukturës sipas kërkesave të ndërkombëtareve.
Këtë herë na e plotësoi dëshirën Mali i Zi, por si do të bëhet më 2016-ën, apo duhet që gjatë gjithë kohës ky ekip të jetë udhëtues i përhershëm? Gjë që nuk është normale për askënd. Të paktën e dimë niveli se deri ku mund të shkojë kjo kombëtare, që në një farë mënyre nuk bën askënd optimist. Por të paktën t’u krijojmë ngrohtësinë vajzave kuqezi që të luajnë në shtëpi, sepse edhe tifozeria duhet ta dijë që ka një kombëtare basketbolli femrash. Ashtu sikurse duhet të ketë për meshkuj. Ashtu sikurse duhet të ketë edhe në volejboll.
Qeveria e ka futur në plan rregullimin e Pallateve të Sportit. Ndoshta shumë vonë, sepse veprimtaritë kombëtare të lojërave me dorë sapo kanë nisur. Dhe një restaurim i tanishëm i “Asllan Rusit” do të thotë ngarkesë dyfish jo vetëm për “Farie Hotin”, po pse jo dhe për sallën sportive në Bathore. E më tej akoma ndryshim tërësor i të gjitha orareve të ndeshjeve. Gjithsesi tashmë e dimë që me Malin e Zi do të luajmë më 25 nëntor në Podgoricë, sikurse më 21 nëntor në Itali, skuadër e cila, ashtu sikurse ajo kuqezi, është me trajner të ri.
Por më tej ku do të jemi? Infrastruktura dhe cilësia e kombëtares së femrave dy pika kryesore që kërkojnë zgjidhje të menjëhershme për të qenë sa më dinjitoz ndaj ndërkombëtareve.
Kalendari i Shqipërisë në Eliminatoreve:
21 nëntor 2015 Itali – Shqipëri ora 18:00
25 nëntor 2015 Mali i Zi – Shqipëri ora 20:30
20 shkurt 2016 Britani e Madhe – Shqipëri
24 shkurt 2016 Shqipëri – Itali
19 nëntor 2016 Shqipëri – Mali i Zi
23 nëntor 2016 Shqipëri – Britani e Madhe
