Arabët vendosin marrëdhënie dhe me Federatën Shqiptare të Volejbollit, ndërsa pas takimit me presidentin Pëllumbi është lënë që në mars të vijnë dy ekipe për një turne të vogël në Tiranë, si dhe të shkohet atje për forcimin e binjakëzimit. Studenti si klub shumësportesh ka forcuar marrëdhëniet me “Al Xhazira Sport Klub” në Abu Dhabi, ndërsa një delegacion i tyre ndodhet në Shqipëri.

Të kryesuar nga presidenti Mohamed Hasan Al Suvaidi delegacioni është pritur dje nga drejtori i klubit shumësportësh “Studenti”, Blendi Nallbani. Ky takim, të paktën edhe sipas njoftimit të shpërndarë nëpërmjet faqes së “Facebook”-ut të klubit shumësportësh Studenti, është fokusuar në rritjen dhe forcimin e marrëdhënieve mes dy klube. Veçanërisht me ekipin e volejbollit të meshkujve të drejtuar nga trajneri Ylli Tomorri.

Pritet që shumë shpejt të ketë edhe shkëmbim të klubeve, ndërsa delegacioni i “Al Xhazira Sport Klub” nga Abu Dhabi është pritur edhe nga zëvendësministri i Arsimit dhe Sportit, Rauf Dimraj. Por ndërkohë arabët kanë pasur edhe një takim me presidentin e Federatës Shqiptare të Volejbollit, Erlind Pëllumbi dhe Sekretarin e Përgjithshëm, Albens Vokopola.

“Tashmë ne kemi hyrë në marrëdhënie zyrtare, që do të thotë se dy ekipe të tyre do të vijnë në mars për një turne të vogël e më pas do të shkojmë ne atje për vendosjen e një binjakëzimi më zyrtar për këtë marrëdhënie me Al Xhazira Sport Klub”, – ka theksuar Pëllumbi, ndërsa Studenti për herë të parë vendos marrëdhënie zyrtare me një klub nga Abu Dhabi.