ASNN – Pushimin e ditës së djeshme, për shkak të ndërprerjes së kampionatit për arsye të ndeshjeve të Kombëtares, skuadra e Kamzës e kanë shfrytëzuar për zhvillimin e ndeshjes miqësore. Përballë kamzalinjve është vënë skuadra e sapokrijuar, Kevitan, që do të debutojë, në këtë edicion futbollistik në Kategorinë e Tretë të Kampionatit Kombëtar të Futbollit. Ndeshja është zhvilluar mjaft e bukur nga të dy skuadrat.
Pas një loje të barabartë, janë miqtë që suprizojnë me anë të Mziut në minutën e 17-të, i cili ka ditur të finalizojë një aksion i ndërtuar nga e majta e sulmit mik. Kroson Hyseni në qendër të zonës, Marku godet, por topi përplaset në shtyllë dhe Mziu nga afër shënon, duke kaluar skuadrën e tij në epërsi. Pas shënimit të golit, pritej që vendasit që kërkojnë të marrin frenat e lojës në dorë.
Por ata janë larg pritshmërive të tyre dhe, me gjithë volumin e krjuar të lojës, rezultati mbeti i pandryshuar. Ndërsa skuadra mike u përpoq të ngacmonte portën e Sejdinit, por pa sukses. Pjesa e dytë e ndeshjes ka të njëjtën pamje dhe sërish formacioni i Vatës, suprizon duke shënuar golin e dytë të ndeshjes, që mban firmën e Hajdarit, që shfrytëzon një kros nga e djathta e Farrukut.
Pas pësimit të golit të dytë, skuadra e Kamzës është hedhur e gjitha në sulm dhe në minutën e 74-t, vendasit fitojnë një 11-metërsh, që shndërrohet në gol Koleci. Dhe është i njëjti autor, që në fund të ndeshjes shënon sërish, duke barazuar gjithçka në 2-2. Të dy skuadrat përgatiten tashmë për ndeshjet e radhës. Kamzalinjtë kanë një ndeshje të vështirë jashtë fushës së tyre ndaj Besëlidhjes, ndërsa Kevitan është në pritje të nisjes së kampionatit të Kategorisë së Tretë.
Kamza – FC Kevitan 2-2
Shënues: Koleci 74’, 90’/ Mziu 17’, Hajdari 66’
Kamza: Sejdini, Lala, Ibrahimaj, Bliu, Gjonaj, Zuna, Doku (Patushi 36’), Lame, Ahmetaj, Koleci, Shero (Aga 65’). Trajner: Bashkim Doku.
FC Kevitan: Malaj, Bregasi, Hajdari, Muça, Gjikola, Mehmeti, Vlashi, Hyseni, Mziu, E. Marku, Farruku. Trajner: Mark Vataj.
U aktivizuan dhe: Vataj, Saliaj, Kamshi, R. Marku, Pjetri, Milla, Korkuti.
Gjyqtarë: A. Rizvani, D. Muka, E. Dardha (Kamza)
