ASNN – “Këpuca e artë” e Kategorisë Superiore, Pero Pejiç, kërkon Kupën me Kukësin, ndërsa të ardhmen e sheh jashtë Shqipërisë. I pari është Ronaldo. Prapa tij Mesi, i treti Aguero. Pas shënuesve të jashtëzakonshëm të Evropës vjen një kroat nga Kategoria Superiore e Shqipërisë. Iku nga Skënderbeu për titullin, të cilin nuk e gjeti në verilindje, por të paktën “Këpucën e Artë” e fitoi prapë.
“Po, për mua është një sezon të suksesshëm, – ka deklaruar ai, duke folur për kanalin televiziv informativ, “ABC News”. – Jemi në vendin e dytë, ndonëse nuk e fituam dot titullin, por s’ka problem. Jemi në lojë për të fituar Kupën ndaj Laçit. Personalisht shënova 31 gola në 34 ndeshje dhe ky është plus për mua. Skënderbeu doli “kampion” dhe unë e respektoj.
“Por nuk kam dëshirë të hedh sytë prapa, pasi jam i përqendruar te Kukësi, – ka vijuar ai për median në fjalë. – Ne jemi në Evropë dhe kjo është gjëja më e rëndësishme, ndërsa po fituam Kupën, ky do të jetë trofeu i parë i klubit e futbollit të Kukësit.” Aty ku shkon Pejiç, shkojnë edhe trofetë. E ka vërtetuar që nga viti 2007. “Kam luajtur me Dinamon, Tiranën, Skënderbeun dhe tani me Kukësin”, – ka kujtuar ai.
“Kam fituar 3 tituj “kampion”, një me Dinamon dhe dy me Skënderbeun, – vijon ai, duke përmendur sukseset. – Kam fituar Kupën me Dinamon, Superkupën me Skënderbeun dhe Kupën me Tiranën. Është e vërtetë që aty ku shkoj unë vijnë trofetë, veçse unë thjesht synoj që të fitoj kupa në cilëndo skuadër që të jem.” Sulmuesi kroat është në gjendje të japë një gjykim sesi ka ecur futbollit shqiptar këta 8 vjet.
“Ka ndryshime, – pohon ai. – Në 2007-tën, kur erdha tek Dinamo, futbolli në Shqipëri ishte agresiv, i fuqishëm, por me pak teknikë. Shtatë-tetë vjet më pas ka përparuar, shkon çdo vit e më mirë. Edhe Kombëtarja e Shqipërisë ka ecur shumë përpara dhe kjo ndikon për mirë në gjithë futbollin shqiptar.” Tifozët kuksianë duan të dinë, ku do të jetë Pero Pejiç sezonin e ardhshëm?
“Kam kontratë me Kukësin deri në Kupat e Evropës, por, pas tyre, jam i lirë, – zbulon ai. – Kam 2-3 oferta jashtë Shqipërisë. Synimi im është që të shkoj jashtë Shqipërisë, në një klub me kushte më të mira financiare. Nëse nuk ia arrij, do të shoh në Shqipëri. Zgjedhja e parë për mua është Kukësi. Do të flas me presidentin Gjici, që është treguar korrekt dhe tani për tani gjithçka është shumë mirë”.
Pritet të luhet edhe finalja e Kupës ndaj Laçit që të mbyllet me sukses sezoni. Pejiç shpreson të jetë vendimtar, ndryshe nga finalja e vjetshme ndaj Flamurtarit, që u humb përkundër gjithë parashikimeve.
