ASNN – Kundërshtarë të tyre janë Venezuela dhe Kili. Argjentina dhe Brazili kanë nisur grumbullimin për ndeshjet në grupin e Amerikës së Jugut, të vlefshme për Eliminatoret e Botërorit “Katar 2022”. Përfaqësuesja argjentinase përballet me Venezuelën, ndërsa ajo braziliane me Kilin. Kështu, Argjentina ka nisur të martën përgatitjet për ndeshjet eliminatore të fazës së Amerikës së Jugut për Botërorin e vitit të ardhshëm. Skuadra është grumbulluar në Karakas dhe midis lojtarëve që stërviten bie në sy prania e Lionel Mesit.
Ai së bashku me shokët e tij, pjesëtarë të Paris SG-së, Di María e Paredes, janë vënë nën urdhërat e trajnerit të përfaqësueses, Lionel Skaloni, duke plotësuar listën prej 30 lojtarësh që ai ka thirrur për 3 ndeshjet e radhës, kundër Venezuelës, Brazilit dhe Bolivisë. Tifozë të shumtë kanë qenë të pranishëm përpara hotelit ku qëndronte ekipi i Skalonit, të cilët kanë brohoritur futbollistët që hipën në dy autobusë për t’u transferuar në Stadiumin “Brígido Iriarte”, vendi i stërvitjes së përfaqësueses argjentinase.
Tashmë 34 vjeç, Mesi vjen në këto Eliminatore me synimin për të arritur titullin e tij të parë me ekipin përfaqësues argjentinas në një Botëror. Argjentina do të përballet me Venezuelën të enjten dhe mungesa për trajnerin Skaloni janë Paredes dhe Kristian Romero, të pezulluar për shkak të kartonëve të verdhë. Argjentina ka 12 pikë pas 6 ndeshjes në grupin eliminator të Amerikës së Jugut, kundrejt 18 pikë që ka Brazili. Nën drejtimin e trajnerit Tite ka nisur stërvitjen edhe përfaqësuesja e Brazilit. Sulmuesi kryesor i skuadrës, Nejmar, dhe mbrojtësi Danilo i janë bashkuar ekipit.
Ndërsa Ribeiro, Markinjos, portierët Everson e Ueverton, sulmuesi Barboza, mbrojtësi Miranda, Paketa, Hulk, Kasemiro, Vinicius Zhunjor, Danilo janë disa nga emrat e futbollistëve që ka thirrur në përfaqësuese trajneri Tite për ndeshjen me Kilin. Venezuelë-Argjentinë dhe Kili-Brazil luhen në datën 3 shtator 2021, përkatësisht në orën 02:00 dhe 03:00 pas mesnate dhe të dyja ndeshjet do të transmetohen drejtpërdrejt nga Rrjeti i Radio-Televizionit Shqiptar (RTSH).
