ASNN – Dy sfidat më të spikatura të javës së 4-t të Kategorisë së Parë, në ekranin publik. Rrjeti i Radio-Televizionit Shqiptar do të sjellë në fundjavë për sportdashësit drejtpërdrejt dy takimet më të spikatura. Të shtunën, duke nisur nga ora 13:00, vjen në ekranin publik dueli midis Kastriotit dhe Tërbunit, ndërsa të dielën, po në të njëjtën orë, përballja Devolli-Lushnja. Kategoria e Parë e Kampionatit Kombëtar të Futbollit i luan të shtunën të gjitha ndeshjet e javës së 4-të në të dy grupet e saj dhe, si çdo javë, Rrjeti i Radio-Televizionit Shqiptar do të sjellë për sportdashësit drejtpërdrejt dy takimet më të spikatura.

Në grupin A, apo grupin e Veriut, do të vijë drejtpërdrejt nga transmetuesi publik, të shtunën, duke nisur nga ora 13:00, dueli midis Kastriotit dhe Tërbunit. Ky takim vë përballë krutanët bashkëkryesues të renditjes, me dy fitore dhe një barazim në këto 3 javët e para, dhe pukjanët, të cilët mbajnë vendin e 6-të, me 4 pikë, pas një fitoreje, një barazimi dhe një humbje në këtë fillimsezon. Po për grupi A, por duke nisur një orë më vonë, nga ora 14:00,  luhen 4 takimet e tjera të kësaj jave të cilat janë Besëlidhja-Veleçiku i Koplikut, Erzeni i Shijakut-Burreli, Korabi i Peshkopisë-Shkumbini dhe Egnatia e Rrogozhinës-Dinamo.

Ndërkaq, në grupin e Jugut, 4 takimet e para luhen të shtunën duke nisur nga ora 14:00 dhe duelet janë Oriku-Elbasani, Apolonia-Iliria e Fushë-Krujës, Besa-Turbina e Cërrikut dhe Pogradeci-Shënkolli. Ndërkaq, takimi më i spikatur i javës, është ai që luhet të dielën, midis Devollit dhe Lushnjës, që gjithashtu do të sillet për sportdashësit drejtpërdrejt nga Rrjeti i Radio-Televizionit Shqiptar, duke nisur nga ora 13:00. Myzeqarët e trajnerit Ilir Gjyla e kanë nisur mbarë, me 3 fitore në po aq javë, por nuk pritet ta kenë të lehtë përballë vendasve të Devollit, që janë ngjitur këtë sezon nga Kategoria e Dytë, por premtojnë të bëjnë të papriturën, sepse ende nuk e njohin humbjen në këtë fillim sezoni, ku kanë korrur dy fitore dhe kanë marrë një barazim.

Kategoria e Parë

Java e 4-t:

Grupi A

Kastrioti                      13:00              Tërbuni Pukë

Besëlidhja                 14:00              Veleçiku Koplik

Erzeni Shijak                        14:00              Burreli

Korabi Peshkopi      14:00              Shkumbini Peqin

Egnatia Rrogozhinë            14:00              Dinamo Tirana

Renditja

1. Shkumbini                            7
2. Kastrioti                                  7
3. Korabi Peshkopi                  6
4. Besëlidhja                             5
5. Erzeni Shijak                                    4
6. Tërbuni Pukë                                    4
7. Egnatia Rrogozhinë                        4
8. Burreli                                                3
9. Dinamo                                  1
10. Veleçiku Koplik 0

Grupi B

Oriku              14:00              Elbasani

Apolonia        14:00              Iliria Fushë-Krujë

Besa               14:00              Turbina Cërrik

Pogradeci      14:00              Shënkolli

Devolli            13:00              Lushnja

Renditja

1. Lushnja                     9
2. Devolli                        7
3. Oriku                          7
4. Apolonia                    6
5. Turbina Cërrik          4
6. Besa Kavajë              3
7. Pogradeci                  3
8. Iliria Fushë-Krujë     3
9. Shënkolli                   1
10. Elbasani 0