ASNN – Trajneri i shquar i futbollit italian dhe evropian, Fabio Kapelo, në një intervistë për mediat sportive italiane theksoi se vetëm 3 futbollistë kanë arritur maksimumin në historinë e lojës së futbollit, lojtarë që kanë shpikur lëvizje, që e kanë bërë futbollin art dhe i kanë siguruar atij një famë të papërshkruar ndër sportdashësit në mbarë botën. Dhe në 3-shen më të mirë të historisë, sipas Kapelos, nuk ka vend për Kristiano Ronaldon.
“Në historinë e lojës së futbollit vetëm 3 njerëz kanë qenë gjenitë e topit: Pele, Maradona dhe Mesi. Sigurisht ky është vetëm mendimi im. Maradona dhe Mesi jo vetëm që mendonin gjëra gjeniale por edhe i zbatonin në praktikë. Së bashku me Pelen, ishin dhe janë futbollistët më mbresëlënës, unik”, – është shprehur Kapelo, i cili ka drejtuar shumë skuadra në karrierën e tij dhe e vërteta është se nuk e ka trajnuar Maradonën dhe Mesin, por i konsideron më të mëdhenjtë.
Kjo deklaratë e Kapelos do të ngjallë indinjatë tek admiruesit e Kristiano Ronaldos dhe vetë portugezin, i cili dy ditë më parë kualifikoi Juventusin në çerekfinalen e Ligës së Kampioneve, falë një 3-golëshi magjik për të cilin mori vlerësime nga sportdashësit në mbarë botën, përfshi dhe “armikun” e tij, argjentinasin Lionel Mesi, i cili theksoi se paraqitja e Kristiano Ronaldos ndaj Atletikos së Madridit ishte magjike.
