Kavajasit në krizë, nuk arrijnë të shënojnë as në portën e boshatisur me anë të Hasës. Të besuarit e Zanit vazhdojnë të humbasin penallti, kështu ka ndodhur dhe dje me Ymerin. Besa e ka nisur furishëm ndeshjen dhe në minutën e 2-të i ka pasur të gjitha shanset për të kaluar në epërsi. Hasa ka shmangur bukur portierin Ujka, ka goditur, por për fatin e mirë të kamzalinjve është gjendur mbi vijën e portës Gjoni dhe goli për kavajasit nuk është realizuar. Shpejt përmbysën situatat dhe me shumë zgjuarsi, pasi i është “vjedhur” bukur mbrojtjes kavajase, Gjonaj ka fituar penallti, që është shkaktuar nga ndërhyrja nga pas e Boriçit.
Merr përsipër të godasë Ymeri, por Dajsinani, një portier i talentuar, ka kuptuar krahun dhe ka pritur. Minutat e mëpasme deri në përfundim të pjesës së parë janë një lojë e fortë në mesfushë, me shumë topa që fluturojnë në ajër dhe që gjithçka është në kufijtë e mërzitjes dhe mediokritetit. Pjesa e dytë ka nisur me zëvendësime në të dy krahët. Në minutën e 47-të, Blloku pas një goditje të bukur me kokë i është afruar golit, por verdhezinjtë e kanë përcjellë topin në goditje këndi. Në të 57-tën minutë, Zuna në një pozicion ballor me portën kavajase, në një largësi prej rreth 20 metrash, ka gjuajtur fort, por Dajsinani ka pritur.
Dhe gradualisht vjen goli i Kamzës, që ka ardhur pas një mrekullie të Hametajt, i cili me një gjuajtje fluturimthi, në një pozicion diagonal me portën kavajase, e ka dërguar topin në trekëndëshin e djathtë të katërkëndorit të mbrojtur nga Dajsinani. Mirëpo gjërat mund të ishin kompromentuar pas një minute, sepse Ujka ka qenë gati në kufijtë e autogolit në portën e tij. Por me kapjen e topit në dy kohë ia ka dalë shpejt të korrigjojë gabimin e tij dhe Kamza shpëton. Ka tentuar Ibrahimllari në minutën e 87-të që të befasojë me një gjuajtje nga rreth 20 metra, por Dajsinani nuk është thyer.
Përgjithësisht një ndeshje nën nivelin mesatar, atje ku kartonët e verdhë kanë qenë të shumtë, ndërsa diferenca është bërë nga goli i Hametajt, që kështu i ka dhënë Kamzës tre pikë shumë të vlefshme për mbijetesën.
Kamza – Besa 1-0
Shënues: Hametaj 65’
Kamza: Ujka, Nino, Gjoni, Ibrahimllari, Poplekaj (Sula 74’), Zuna, Ymeri (Sharko 87’), Gjonaj, Blloku, Koleci, Peposhi (Hametaj 46’). Trajner: Y. Zani
Besa: Dajsinani, Boriçi, Perja, Bajaziti, Dimo, Kullolli, A. Çelhaka, S. Çelhaka (Leka 46’), Sallaku, Hasa, Nuri (Hoxha 46’). Trajner: B. Sinella
Gjyqtarë: A. Beqiri, A. Shkreta (Tiranë), R. Zaimi (Poliçan)
Kartonë të verdhë: Poplekaj, Zuna, Koleci, Sharko / Boriçi, Dimo, Sallaku, Hasa
