ASNN – Njëri nga trajnerët më të suksesshëm të momentit në Evropë, gjermani Jurgen Klop, ka deklaruar sot se do të tërhiqet nga drejtimi i skuadrës së Borusias së Dortmundit në fund të këtij sezoni. 47-vjeçari i ka parashtruar kërkesën klubit të tij që ta prishë kontratën aktuale midis të dy palëve, kontratë që skadonte në 2018-n.
“Nuk jam i lodhur, nuk kam patur asnjë kontakt me ndonjë klub tjetër dhe as nuk kam ndërmend të bëj një vit pushim”, – deklaroi ai, duke nënkuptuar se, për të, thjesht kishte ardhur koha të largohej nga Borusia e Dortmundit.
Klopi e ka drejtuar Borusian e Dortmundit që nga 2008-ta, duke e udhëhequr këtë skuadër drejt dy titujsh “kampion” në Bundesligë, si dhe deri në finalen e Ligës së Kampioneve në 2013-tën, ku u mund nga Bajerni i Mynihut.
Por aktualisht, Dortmundi është plot 37 pikë pas kryesueses dhe rivales bavareze. Sipas mediave gjermane, destinacioni i mundshëm për të ardhmen e trajnerit është Premier Liga Angleze.
