ASNN – Janë luajtur dje 5 nga takimet e javës së 11-të të grupit A të Kategorisë së Dytë të Kampionatit Kombëtar të Futbollit, ndërsa takimi i fundit, ai midis Tiranës B dhe Erzenit, luhet sot. Ajo që ra në sy, ishte se nga 5 takime, 3 prej tyre u mbyllën në barazim, madje dy me rrjeta të paprekura. Korabi i është rikthyer fitores pas ndalesës në sfidën e kaluar me Partizanin B, ku barazoi me rrjeta të paprekura.

Dibranët arrijnë të mundin Vorën me rezultatin 1-0 në sfidën e luajtur në fushën e tyre. Edhe pas javës së 11-të, Korabi ruan vendin e parë në Grupin A me 28 pikë. E veçanta është se nga 9 fitore, pesë i ka arritur me rezultatin minimal, 1-0, ashtu siç ndodhi edhe dje. Ashtu si në të gjitha takimet e këtij sezoni, sfida ndaj Vorës është ndjekur nga rreth 2,000 tifozë që kanë mbështetur skuadrën.

Në barazim pa gola ka përfunduar takimi mes Domosdovës dhe Partizanit B. Rastet nuk kanë munguar për të dy ekipet, por ai që ka mungon goli. Barazim pa gola ka patur edhe në takimin midis Olimpikut dhe Albpetrolit, por dy lojtarë kanë përfunduar në spital. Në minutën e 25-të, Daniel Liçka i Albpetrolit dhe Elton Fuçia, gjatë një dyluftimi në ajër për topin e parë, janë përplasur kokë më kokë.

Njëri prej tyre ka çarë vetullën, ndërsa tjetri kokën. Ka qenë ndërhyrja e shpejtë e mjekut Ermal Zani që u ka dhënë ndihmën e parë. Më pas, lojtarët janë dërguar në spital e janë mjekuar aty për 20 minuta.

Ndërsa Luzit 2008 i mjaftojnë 20 minuta për të thyer Sukthin. Niveli i lojës ka qenë i dobët, për shkak të terrenit të vështirë, por Luzi 2008 e ka administruar më mirë lojën se miqtë. Me këtë fitore, Luzi mbetet në vendin e 4- t në klasifikim, ndërsa Sukthi në vendin e 7-të. Së fundi, Skrapari ka barazuar në fund, 2-2 me Teutën B, por kanë protestuar miqtë dhe futbollisti i tyre, Rapi, ndëshkohet me të kuq.

Kategoria e Dytë

Grupi A

Java e 11-të

(14-15 dhjetor 2014)

Të dielën:

Luzi 2008 – Sukthi              2-0

Korabi – Vora                        1-0

Olimpik – Albpetrol              0-0

Domosdova – Partizani B   0-0

Skrapari – Teuta B               2-2

Të shtunën:

Tirana B – Erzeni                 (13:00)

Shënkolli – pushim

Renditja

Nr.       Skuadra         N.        F.         B.        H.        Gsh-Gp          Pikë

1. Korabi 10        9          1          0          15-3                28
2. Erzeni 9        8          0          1          25-12              24
3. Partizani B 10        6          3          1          12-1                21
4. Luzi 2008 11        6          2          3          19-7                20
5. Shënkolli 10        4          2          4          19-13              14
6. Vora 10        3          3          5          15-16              12
7. Sukthi 10        3          3          4          12-13              12
8. Albpetroli 10        2          5          3          8-11              11
9. Teuta B 11        2          4          5          13-15              10
10. Tirana B 9        2          3          4          14-17              9
11. Olimpik 10        2          3          5          13-17              9
12. Skrapari 10        1          2          7          4-26              5
13. Domosdova 10        1          1          8          7-26              4