ASNN -Kampionati Kombëtar në Volejboll për meshkuj ka luajtur të dielën të gjitha ndeshjet e javës së 7-të dhe Erzeni ruan kreun, kurse Vllaznia mbetet e pamposhtur, ndërsa fitojnë edhe Tirana e Partizani. Kështu, nuk ka patur të papritura në takimet e kësaj jave e, si rrjedhojë, asnjë ndryshim edhe në renditje, pasi të gjitha ekipet e kreut i fituan ndeshje e luajtura Sot.

Skuadra shijakase ruan vendin e parë pas fitores 3-0 ndaj Skënderbeut, por një sukses që nuk ishte aspak i lehtë për të. Miqtë nga Korça, që këtë sezon po bëjnë një paraqitje mjaft të mirë, rivalizuan në shumicën e kohës, madje me pak kujdes edhe mund të kishin fituar diçka në këtë sfidë. Por vendasit u treguan më të saktë në momentet vendimtare, duke e merituar fitoren.

Vllaznia qëndron e pamposhtur këtë sezon, duke korrur fitoren e 6-të në po kaq takime të luajtura. Skuadra shkodrane mundi 3-0 në Pallatin e Sportit “Qazim Dervishi” rivalët e Teutës. Një rezultat i pritshëm ky, duke parë se luanin dy ekipe që ndodhën në skajet e kundërta të renditjes. Epërsia e Vllaznia ishte e dukshme, që i fitoi të 3 setet me diferenca të mëdha.

Po në 3 sete ka fituar edhe Tirana në Elbasan ndaj ekipit vendës, takim i dominuar nga bardheblutë, që vetëm në setin e tretë rrezikuan disi, por e kishin lojën nën kontroll. Ka ardhur sot edhe fitorja e dytë radhazi në kampionat për Partizanin, që mbylli gjithçka në 3 sete ndaj Farka Volejit në derbin kryeqytetas. Një ndeshje me rivalitet në të 3 setet, me Farkën që rivalizoi, por në pikët e fundit nuk arriti të jetë e saktë, duke i dhënë mundësi Partizanit të fitojë dhe të ngjitet në vendin e 5-të.

Kampionati Kombëtar

i Volejbollit – Meshkuj

Java e 7-të

Të dielën, 10 nëntor 2018:

Erzeni – Skënderbeu           3-0

(25-22, 25-15, 25-23)

Vllaznia – Teuta                    3-0

(25-14, 25-18, 25-13)

Elbasani – Tirana                0-3

(12-25, 18-25, 23-25)

Partizani – Farka Volej         3-0

(25-20, 25-20, 25-21)

Studenti                                 pushim

Renditja

Nr.       Skuadra         N.        F.         H.        Pikë

1. Erzeni                        7          6          1          19
2. Vllaznia         6          6          0          16
3. Tirana             7          5          2          15
4. Skënderbeu  6          4          2          13
5. Partizani        6          3          3            9
6. Studenti         6          3          3            9
7. Farka Volej    6          1          5            3
8. Elbasani        6          0          6            0
9. Teuta              6          0          6            0