ASNN – Pas takimeve të para çerekfinale të Kupës së Shqipërisë që u zhvilluan në mesjavë, të dielën dhe të hënën do të luhet java e 25-të e Kategorisë Superiore të Kampionatit Kombëtar të Futbollit. Dy takimet e para të javës do të zhvillohen të dielën, të dyja duke nisur nga ora 13:30.
Egnatia do të përballet në shtëpi me Teutën, ndërsa Kukësi me Erzenin. Kryesuesit e “Abissnet Superiore” do të kërkojnë të rikthehen te triumfi në kampionat dhe në stadiumin “Arena Egnatia” do të synojnë vetëm fitoren, edhe pse durrsakët kanë një bilanc mjaft pozitiv në dy sezonet e fundit me rrogozhinasit.
Ndërsa Teuta vjen në këtë ndeshje pas triumfit me Kukësin në kampionat dhe synimi i vetëm mbetet vazhdimësia e rezultateve pozitive. Një takim mjaft interesant është edhe ai Kukësi-Erzeni, dy skuadrat që ndodhen në vendet e fundit të renditjes. Pas një ecurie negative, Erzeni u rikthye te fitorja në Kupën e Shqipërisë.
Dhe tani do të kërkojë të bëjë të njëjtën gjë edhe në kampionat, ndërsa Kukësi nuk ndodhet në një moment të mirë dhe në shtëpi ka si objektiv vetëm fitoren. Në takimin tjetër të së dielës, që nis në orën 17:00, Skënderbeu do të përballet në fushën e vet me Partizanin.
Korçarët e kanë fituar në ndeshjen e parë në shtëpi këtë sezon me të kuqtë dhe synojnë të triumfojnë sërish, ndërsa Partizani kërkon fitoren e radhës pas triumfit në derbin e kryeqytetit. Të hënën, duke nisur nga ora 17:00 do të zhvillohen dy takimet e fundit të kësaj jave.
Kështu, Tirana do të përballet me Laçin në sfidën që do të luhet në Stadiumin “Elbasan Arena”. Bardheblutë, tashmë në vendin e 5-të do të kërkojnë të rikthehen te fitorja në kampionat, megjithatë nuk do të jetë e lehtë pasi Laçi po kalon një moment të mirë në Kategorinë Superiore dhe do të tentojë surprizën ndaj Tiranës.
Ndeshja tjetër e së hënës është ajo Dinamo City-Vllaznia. Ky takim do të luhet në Stadiumin “Niko Dovana” të Durrësit dhe do të vihen përballë dy skuadrat më në formë të momentit në kampionat. Shkodranët nuk e njohin humbjen në kampionat prej 10 ndeshjesh, ndërsa durrsakët prej 3 ndeshjesh, ku nuk kanë pësuar asnjë gol.
