ASNN – Kampionati Kombëtar i Volejbollit për Meshkuj ka luajtur sot javën e tij të 18-të, e cila në fakt ka qenë e cunguar, pasi takimi Skënderbeu-Studenti është shtyrë për shkak të pjesëmarrjes së ekipit kampion në fuqi në Kupën “Adem Jashari 2015” të volejbollit për meshkuj, që u zhvillua në Kosovë.

Në dy takimet e zhvilluara sot, teksa Elbasani ishte pushim këtë javë, spikati fakti se të dyja skuadrat udhëtuese fituan. Kështu, në Durrës, Tirana ka mbaruar punë në 4 sete ndaj Teutës vendase, duke u ngjitur kështu në kuotën e 36 pikëve, vetëm 3 pikë më pak sesa Studenti kryesues.

Ndërkaq, në takimin tjetër të zhvilluar në Shkodër, ku janë nevojitur të 5 setet, Vllaznia vendase është mundur nga Farka Volej 2-3. Skuadra e drejtuar nga trajneri pasionant Dritan Bardhi, vazhdon kështu formën e saj të shkëlqyer, që e çoi pak javë më parë deri në finale të Kupës së Shqipërisë, dhe synon t’u rrëmbejë shkodranëve vendin në “play-off”-in final për titull.

Kampionati Kombëtar

i Volejbollit – Meshkuj

Java e 18-të

(7 mars 2015)

Vllaznia – Farka Volej         2-3

Teuta – Tirana                      1-3

Skënderbeu – Studenti      (e shtyrë)

Elbasani                                pushim

Renditja

Nr.       Skuadra         N         F          H         Setet               Pikë

1. Studenti 15        13        2        42-14              39
2. Tirana 15        13        2        40-19              36
3. Teuta 16        8        8        31-29              26
4. Vllaznia 14        8        6        30-21              25
5. Farka Volej 15        8        7        28-25              22
6. Skënderbeu 14        1        13        13-41              5
7. Elbasani 15        1        14        9-44              3