ASNN – Kategoria e Parë e Kampionatit Kombëtar të Futbollit luan të shtunën të gjitha ndeshjet e javës së 18-të në të dy grupet e saj dhe Rrjeti i Radio-Televizionit Shqiptar do të sjellë për sportdashësit takimin e vlefshëm për grupin A, që do të zhvillohet në Lezhë, midis Besëlidhjes dhe Korabit. Të dyja skuadrat kanë nga 27 pikë dhe synojnë të mbeten në gjysmën e sipërme të renditjes, që vijon pastaj betejën për titull.
Në takimet e tjera të grupit A, apo grupit të Veriut, Veleçiku pret Shënkollin, Erzeni dhe Vora përballen në Fushë-Krujë, Iliria ndeshet në Shkodër me Vllazninë, ndërsa në kryeqytet përballen Dinamo me Burrelin. Ndërkaq, në grupin B, apo grupin e Jugut, aty ku Bylisi do të jetë mysafir në fushën e Orikut, ballshiotët kryesojnë të shkëputur renditjen, të ndjekur nga Besa, e cila pret në fushën e vet Turbinën e Cërrikut.
Në takimet e tjera të javës së 18-të të grupit B, Apolonia është mysafire në Rrogozhinë, për t’u ndeshur me Egnatian vendase, Pogradeci pret Lushnjën, ndërsa Tomori pritet të kthehet në fushë pas bojkotit të ndeshjes së shkuar, kur të përballet në Berat me Elbasanin.
