ASNN – Kastrioti dhe Teuta hapën garën fund e krye, Kukësi ka shansin të kapë vendin e dytë. Java e 16-të e Kategorisë Superiore do të nisë të premten, me kryendeshjen Kukësi-Skënderbeu. Është një duel direkt për zonën e kreut, sepse Skënderbeu është në vend të dytë me 30 pikë, kurse Kukësi në vend të tretë me 27 pikë. Një fitore e verilindorëve do të sillte barazimin me pikë dhe ngjitjen e Kukësit në vend të dytë, duke e bërë garën mjaft interesante. Në të kundërt, një disfatë do ta nxjerrë Kukësin nga zona e kreut dhe mund të sjellë rrezikun e daljes nga skena e pretendentëve.

Barazimi nuk do të kënaqte askënd, pasi Partizani kryesues ka 34 pikë dhe një tjetër fitore do ta shkëpuste atë në kryesim dhe do ta shndërronte në favorit serioz për titullin. Natyrisht, kjo javë nuk është përcaktuese për fatet e titullit, as për mbijetesën, por do të thotë shumë për të dy zonat e renditjes, si për atë të kreut, ku ka të paktën 5 skuadra me pretendime titulli, ashtu dhe në zonën e fundtabelës, ku 4 ekipe luajnë për t’i shpëtuar rënies nga kategoria. Dy ekipe ia dolën ta bënin garën interesante në këtë fazë: Kastrioti dhe Teuta.

Kjo e fundit mundi brenda në Korçë Skënderbeun 2-0, duke u afruar tashmë me vetëm dy pikë larg vendit të dytë, ndërsa Kastrioti mundi në mënyrë të papritur Flamurtarin 1-0 dhe me trepikëshin e fundjavës së kaluar shkoi në 10 pikë, duke zbritur Kamzën në vend të fundit dhe duke vënë në rrezik serioz për mbijetesë Tiranën që ka 11 pikë dhe Luftëtarin që ka 13 pikë. Pra gara e mbijetesës është më interesante se kurrë. Në kuadër të javës së 16-të, përveç duelit Kukësi-Skënderbeu që luhet të premten, do të vihen përballë Tirana-Kastrioti dhe Teuta-Partizani.

Duele që luhen të shtunën, ndërsa të dielën Kamza pret Luftëtarin dhe Flamurtari pret Laçin. Nisur nga përplasjet, kalendari i kësaj jave ofron duele mjaft interesante në kryesim, por edhe në fundtabelë. Këto janë përballje direkte që kanë peshë për vazhdimësinë, prandaj kjo javë pritet me interes edhe nga sportdashësit.

Kategoria Superiore

Java e 16-të

Të premten, 7 dhjetor 2018:

Kukësi – Skënderbeu          (14:00)

Të shtunën, 8 dhjetor 2018:

Tirana – Kastrioti                   (14:00)

Teuta – Partizani                   (17:00)

Të dielën, 9 dhjetor 2018:

Kamza – Luftëtari                 (14:00)

Flamurtari – Laçi                   (17:00)

Renditja:

Nr. Skuadra               Pikë

1. Partizani             34
2. Skënderbeu 30
3. Teuta 28
4. Kukësi             27
5. Laçi 26
6. Flamurtari 22
7. Luftëtari             13
8. Tirana             11
9. Kastrioti             10
10. Kamza   9