ASNN – Studenti i është rikthyer fitoreve në ndeshjen e tretë të fazës së dytë, ndërsa vetëm në setin e 5-të ia ka dalë të jetë triumfues ndaj Tiranës në takimin e vlefshëm për javën e 13-të të Kampionatit Kombëtar të Volejbollit për Meshkuj. Madje teksa ka kryesuar 2-0, me diferencë të madhe në të gjitha nivelet ndaj Tiranës, u krijua përshtypja se suksesi do të ishte më i lehtë për skuadrën e Demit dhe Rekës.

Në fakt deri në ato momente Studenti ishte fuqiplotë jo vetëm në sulm, por dhe në bllok e në shërbim. E duke i pasur të gjitha treguesit më mirë se sa Tirana duhet të kishte përfituar. Mirëpo Tirana nuk është dorëzuar. Ka bërë përmbysjen e madhe, por deri në setin e pestë. Pas kësaj rikthehet Studenti, që dje ka bërë ndeshjen më të mirë të fazës së dytë, në një kohë që ishte mundur papritur, 0-3 nga Erzeni dhe 2-3 nga Farka Volej.

Në takimet e tjera, Partizani jo vetëm që ka ruajtur të pacenuar kreun, por shumë thjeshtë e pastër ia ka dalë të jetë fitues ndaj Farka Volej. Për skuadrën e Bardhit ka qenë shumë pak Osman Qepa, ndërsa të kuqtë tashmë janë pa malazezin Vuk Medenica, që duket se nuk mund t’iu bëjë punë për objektivat që kanë. Në përfundim, 3-0 për Partizanin, që kryeson i shkëputur në kuotën e 33 pikëve.

Të kuqtë ndiqen nga Erzeni, që me fitoren në 3 sete të arritur dje ndaj Vllaznisë, janë në vendin e dytë, në kuotën e 28 pikëve, 3 më tepër sesa Studenti dhe 4 më tepër sesa Tirana. Ndërsa shkodranët, kampionë në fuqi, e shohin t’u tretet në horizont mundësia për të mbrojtur kurorën, pasi janë shumë larg 4-shes që do të marrë pjesë në “play-off”-in për titull. Në takimin e fundit të javës, Skënderbeu ka fituar 3-0 në Durrës ndaj Teutës.

Kampionati Kombëtar

i Volejbollit – Meshkuj

Java e 13-të

(24 shkurt 2018)

Teuta – Skënderbeu           0-3

Erzeni – Vllaznia                 3-0

Farka Volej – Partizani        0-3

Tirana – Studenti                 2-3

Elbasani                                pushim

Renditja

Nr.       Skuadra         N.        F.         H.        Setet               Pikë

1. Partizani        12        11          1        34-9                33
2. Erzeni                        11          9          2        30-9                28
3. Studenti         12          9          3        30-16              25
4. Tirana             12          8          4        29-18              24
5. Skënderbeu  11          5          6        17-19              15
6. Vllaznia         11          4          7        16-21              13
7. Farka Volej    12          4          8        18-26              12
8. Elbasani        11          2          9          6-28                6
9. Teuta              12          0        12          2-36                0