ASNN – Vjen Mesi në “San Siro”, rekord historik përfitimesh nga biletat me 5.8 milionë Euro. Pak javë më parë dueli derbi mes Milanit dhe Interit theu rekordin e përfitimeve nga shitja e biletave pasi kapërceu 4.5 milionë Euro. Por kjo nuk ishte shifra rekord e përfitimeve të ardhura nga shitja e biletave në një ndeshje të vetme në Itali.
Rekordin e mbante ndeshja e sezonit të kaluar midis Romës dhe Liverpulit në gjysmëfinale të Ligës së Kampioneve, që arkëtoi plot 5.6 milionë Euro. Në fakt, Barcelona njoftoi se në ndeshjen kundër Interit ka ftuar “nën armë” edhe Lionel Mesin dhe kjo përshpejtoi shitjen e biletave.
Mësohet se u shitën të gjitha, të 78 mijë biletat që u vunë në dispozicion për duelin në “San Siro” dhe nga njoftimet paraprake të Interit, janë arkëtuar 5.8 milionë Euro, shifra rekord deri më sot në Itali. Padyshim, ardhja e Barcelonës, pozitat e skuadrave në grupin B dhe rivaliteti kokë më kokë me katalanët për kreun e renditjes, e bën këtë sfidë mjaft tërheqëse. Tifozëve zikaltër u duhet fitorja që ta shijojnë në maksimum pjesëmarrjen në Ligën e Kampioneve pas shumë vitesh.
