ASNN – Ashtu siç ishte parashikuar avioni i përfaqësueses së Serbisë zbriti në aeroportin “Nënë Tereza” të Rinasit rreth orës 17:45 të së mërkurës. Asnjë kontakt me mediat shqiptare për skuadrën, që doli menjëherë me autobus nga zona “VIP” e aeroportit të Rinasit. Por ka nisur me një incident, fatmirësisht pa pasoja serioze, aventura shqiptare e kombëtares së Serbisë.
Autobusi me të cilin udhëtonte skuadra përfaqësuese e Serbisë u qëllua me gurë sapo kaloi rrethrrotullimin e “Zogut të Zi” për të hyrë rrugën e Durrësit në kryeqytet. Pamjet e xhiruara nga një prej lojtarëve në autobus dhe të publikuara më pas nga mediat serbe përgënjeshtrojnë atë që në fillim u trumbetua si një aksident i rëndë nga zyrtarët e federatës serbe dhe mediat atje.
Sipas asaj që thuhej në mediat serbe ku citohej zëvendëspresidenti federatës serbe, Aleksandar Boshkoviç gurët e hedhur nga tifozët shqiptarë thyen disa xhama të autobuzit. Por pamjet kanë dëshmuar se gjërat janë krejt ndryshe. Një tjetër përgënjeshtrim zyrtar erdhi nga shefi i zyrës së shtypit të Federatës Serbe të Fubollit përpara konferencës për shtyp të trajnerit Çurçiç dhe kapitenit Ivanoviç.
“Në mes të rrugës nga aeroporti drejt hotelit u qëlluam me disa gurë, – ka thënë zyrtari serb. – Njëri prej tyre ishte më i madh, por mjeti nuk u dëmtua. Për këtë kemi njoftuar Ministrin e Sportit dhe Kryeministrin Vuçiç, ndërsa jemi në kontakt të vazhdueshëm me Federatën Shqiptare.” Ky ishte incidenti i vetëm në eksperiencën e parë të përfaqësueses serbe në tokën shqiptare.
Me një eskortë prej 36 mjetesh të policisë shqiptare dhe me autostradën e boshatisur, autobusi i përfaqësueses serbe, ai i gazetarëve serbe dhe zyrtarëve të Federatës udhëtoi i pashqetësuar deri në hyrje të kryeqytetit shqiptar. Edhe pjesa tjetër e udhëtimit pas incidentit kaloi pa asnjë problem, megjithëse në dy trotuarët e rrugës së Durrësit dhjetëra tifozë valëvitnin flamujt shqiptarë.
Pasi përshkoi e parrezikuar edhe bulevardin kryesor edhe ai i boshatisur nga mjetet e tjera kombëtarja e Serbisë u akomodua në hotel sipas axhendës. Vetëm pak minuta më pas u mor vesh për incidentin, për të cilin policia e shtetit ka reaguar zyrtarisht. Me anë të një deklarate për shtyp bëri të ditur se që nga zbritja e skuadrës serbe në aeroport dhe deri në akomodimin në hotel nuk është konstatuar asnjë problem.
Sipas saj vetëm në momentin e mbërritjes në hotel është vënë re një plasaritje në krahun e drejtuesit të autobusit, e cila mund të jetë shkaktuar nga goditja me gurë nga një distancë e largët.
