Komuniteti i volejbollit shqiptar dhe sportit në përgjithësi dje pasdite ka përcjellë për në banesën e fundit Fatmir Sharofin, që të dielën, pas një sëmundjeje të rëndë, është ndarë nga jeta në moshën 79-vjeçare. Një figurë që i dha gjithçka volejbollit shqiptar jo vetëm si lojtar e si trajner, por dhe si vëzhgues, ndërsa deri në vitet e fundit ka qenë pranë parketit e gjyqtarëve të volejbollit. Petrit Shehu në Historinë e Volejbollit shqiptar 1945-2010 do ta quante Fatmir Sharofin “Pëllumbi me flatra skifteri”.
“Ngjiste shpejtë shkallët e cilësisë individuale në moshë fare të re falë punës dhe talentit të tij. Volejbollist kurajoz me lëvizshmëri të kënaqshme në fushë. Punonte mirë në rrjetë dhe preferonte gjuajtjet larg saj falë kërcyeshmërisë së tij. Mjaft i vëmendshëm në situatat e lojës si dhe shpeshherë moderator për ekipin”, – është kjo karakteristika që Petrit Shehu bënte në “Historinë e Volejbollit Sshqiptar” për Fatmir Sharofin. I lindur më 1937 ai shumë shpejt do të niste karrierën e volejbollistit.
Dhe, në fundin e viteve 1950, ai e niste me Tiranën. Më pas në vitin 1961-1962 ai do të jetë pjesë e Partizani. Dhe që nga 1963 e deri në fund të sezonit 1972-1973 do të jetë pjesë e Tiranës nën drejtimin e Fatmir Mekës. Më pas për dy sezone do të jetë trajneri i Tiranës në volejboll për meshkuj pikërisht në sezonet 1973-1974 dhe 1974-1975. Shkrirja e meshkujve e bëjnë Sharofin trajnerin e Tiranës në volejboll për femra që nga sezoni 1976-1977 deri më 1983-1984.
Pra për gati tetë sezone. Bie në hije për një periudhë të gjatë derisa në dy sezone 2002-2003 dhe 2003-2004 do të jetë trajneri i Minatorit. E së fundmi do të ishte dhe vëzhgues. Me ndarjen e tij nga jeta volejbolli ka humbur një figurë të saj. Redaksia e gazetës “Sport Ekspres” i shpreh ngushëllime familjes Sharofi për humbjen e të afërmit të tyre dhe ndarjen nga jeta të Fatmirit. Këtyre ngushëllimeve u bashkohet edhe AlbanianSport.com.
