Jeta ka treguar se një rang njerëzish të shquar, edhe pse për shkaqe natyrore janë larguar nga jeta reale fizikisht, për gjurmët e arta që ata kanë lënë në veprimtaritë kombëtare, shoqërore e njerëzore shpirtërisht janë përsëri midis nesh.  Njëri prej tyre është dhe Ali Kastati që në botën e sportit shqiptar simbolikisht njihet si fenomeni Kastrati. Dhe s’është aspak teprim. Jeta e maturuar e mjeshtrit të pashoq ka gjallëruar në sporte burrërore si mundja, peshëngritja dhe veçanërisht tek boksi që e kishte për zemër në mënyrë të habitshme për nga dinamika e intensiteti si sportist e trajner është e rrallë për gjithkënd.

Dekoratat, medaljet e titujt sportive janë “grada” aq ambicioze dhe të shumta sa do ta lakmonin edhe gjeneralët më të famshëm, që në fakt janë të fituar me vullnet spartan, mundim sizifi, jo në fushëbeteja e në frontin e luftërave, por në beteja rivalizuese në ring, në tapet e në pedanë. Pse jo edhe në terapinë mjekësore sportive. “Mjeshtri i Madh, “Urdhëri i Artë Naim Frashëri”, “Nderi i Sportit Shqiptar”, “Mjeshtër i Merituar i Sportit”, “Trajner i Merituar Kombëtar”, “Urdhëri Olimpik”, janë disa nga titujt e të madhit Ali Kastrati. Pa thënë që ka qenë fitues në anketën e 12 sportistëve më të mirë të të gjitha kohërave, apo dhe tek 5 më të mëdhenjtë e ringut shqiptar.

Historia e suksesit të sportit të Ali Kastrati si sportist dhe trajner i ekipit legjendar Partizani, por dhe atij kombëtar, numëron 51 medalje kampioni. Jo pak për t’u quajtur një kampion i madh, madje shumë i madh në të gjitha historinë kombëtare të sportit shqiptar, si dhe është për t’u përfshirë në historinë e librit “Guinness”. Ja përse Kastrati i madh i përket asaj plejade sportistësh e trajnerësh të pashoq që me cilësitë morale e fizike të larta për kontributin e çmuar në sport përfaqëson një emër me popullaritet proverbial. Është nga ata që kanë shkrirë gjithçka duke i sportit vitet më të bukura të jetës së gjatë, ndërsa është një model që rrallë mund të përsëritet.

Këto pak rreshta janë për ty mjeshtër në tre vjetorin e ndarjes fizikisht nga bota e sportit dhe gjiri i familjes së shtrenjtë. Ne sportistët e tu, institucionet sportive dhe veçmas Presidenti i Republikës u kemi një borxh, amanetin që latë në momentet e fundit të jetës, dhënien e titullit më të lartë.

* Mjeshtër i Madh

** Mjeshtër i Sportit