ASNN – Organizmi që qeveris futbollin në vend nuk do të ketë të drejtë vote, bën thirrje për bojkot. Komiteti Olimpik Kombëtar Shqiptar (KOKSH) ka konfirmuar 17 prillin si datën kur do të mbahet Asambleja Zgjedhore, por të enjten është mësuar se, disa prej Federatave dhe shoqatave sportive nuk do të kenë të drejtë vote për mungesë dokumentacioni. Një nga këto është edhe Federata Shqiptare të Futbollit (FSHF), e cila ka bërë të ditur se u njoftua të enjten përmes një e-maili se nuk do te këtë të drejtën e votës në Asamblenë Zgjedhore te Komitetit Olimpik Kombëtar Shqiptar, duke u cenuar kështu, sipas saj, “nga një e drejtë themelore e çdo organizate me anëtarësi”.
Me këtë njoftim FSHF-së iu bë gjithashtu e ditur se kandidati i propozuar prej komunitetit të futbollit nuk do këtë të drejtën të zgjidhet. “Ashtu si FSHF-së, edhe federatave të tjera u është mohuar kjo e drejtë, – shkruan organizmi që qeveris futbollin në vend në një deklaratë për shtyp, që më tej vijon: “Në listën e gjatë të vendimeve kundër interesave të sportit, ky është patjetër më i rëndi në historinë e këtij komiteti që vetëm olimpik e kombëtar nuk është. Me bindjen se zgjedhja e një presidenti është problemi i fundit që KOKSH-i ka, FSHF ju përgjigj kërkesës për mendim të zv/Presidentit dhe Kandidatit për President, Vojo Malo, duke propozuar shtyrjen e asamblesë zgjedhore të datës 17 prill.”
“Me qëllim rregullimin e problemeve themelore të këtij institucioni që fillojnë dhe mbarojnë tek anëtarësia, – vijon deklarata. – Duke pasur axhendë tjetër, nën shembullin e partive politike, nga (nuk)-dihet-se-kush u vendos ndryshe, duke u injoruar edhe një herë qoftë kushtet higjienike, qoftë masat kufizuese të vendosura për shkak COVID-19.” Në vijim, Federata Shqiptare e Futbollit ka bërë të ditur edhe vendimin e saj, duke sqaruar: “Për qetësinë e organizatorëve, FSHF nuk do të marrë pjesë në këtë asamble dhe fton secilën federatë që ka sadopak ndërgjegje për çka po ndodh ta bojkotojë atë për shkak të veprimeve të panumërta antiligjore, që vijojnë të ndodhin e që do të vazhdojnë të jenë objekt i hetimeve gjyqësore.”
“Dëshirojmë sot të nënvizojmë se ndryshe nga çfarë u intereson organizatorëve të kësaj pengmarrjeje dhe bashkëpunëtorëve të tyre, kritikat dhe sugjerimet e FSHF nuk janë përpjekje për t’i marrë udhëtimet jashtë shtetit ndokujt, por besim i sinqertë se përmes diskutimeve të hapura e në dobi të sportit kjo organizatë do mund vërtet të fillojë një kapitull të ri të olimpizmit shqiptar. Por, kur asnjë përpjekje nuk kursehet për ta zbehur zërin e komunitetit më të madh të sportistëve në vend, kjo organizatë ka një problem serioz me të vërtetën dhe ka dështuar në përmbushjen detyrave për të cilat është themeluar. FSHF nuk ka interes për të qenë pjesë e asnjë organizate, e cila nuk e dëshiron kontributin e saj aq më pak një organizate politike, ndaj do të diskutojë me anëtarët e vet nëse do vijojë të jetë pjesë e KOKSH-it”, – ka përfunduar deklarata për shtyp e organizmit që qeveris futbollin në vend.
