ASNN – Komiteti Olimpik Ndërkombëtar ka vendosur që ta pranojë përkohësisht Kosovën në familjen olimpike botërore, çka i hap rrugën sportistëve kosovarë që të marrin pjesë si përfaqësues të një shteti të pavarur dhe të njohur ndërkombëtarisht në Lojërat Olimpike të 2016-s në Rio De Zhaneiro të Brazilit.
Komiteti Ekzekutiv i organizmit që qeveris lëvizjen olimpike botërore i ka siguruar kështu njohjen e përkohshme Kosovës, e cila shpalli pavarësinë në 2008-n, si dhe do të propozojë njohjen e plotë Asamblenë e Përgjithshme Vjetore, që do të mbahet në dhjetor të këtij viti në Montekarlo.
Sipas asaj që raportojnë mediat ndërkombëtare, vendimi i dhjetorit është thjesht një formalitet. “Ky vendim u mor nga Komiteti Ekzekutiv në interes të sportistëve në Kosovë dhe për t’u hequr atyre çfarëdolloj pasigurie që mund të kenë”, – shkruhet në deklaratën e Komitetit Olimpik Ndërkombëtar.
“Kjo do t’u mundësojë atyre që të marrin pjesë në garat kualifikuese për Olimpiadën e Rios në 2016-tën, si dhe në Lojërat e mëpasme Olimpike”, – shton më tej deklarata. Komiteti Olimpik Ndërkombëtar theksoi se Kosova i përmbush kriteret teknike dhe sportive për njohje, përfshi edhe përkufizimin e një “vendi” në Kartën Olimpijke, si një “shtet i pavarur i njohur nga komuniteti ndërkombëtar.
