ASNN – Me 28 pikët e shënuara në fitoren ndaj Atlantës, ylli i Los Anxhelos Lejkërs, Kobi Brajënt, ka arritur në shifrën e mbi 32 mijë pikëve të shënuara në NBA.
Dhe falë kësaj, është pranë të qenit pikëshënuesi i tretë më i mirë i kampionatit amerikan të basketbollit, nder të cilin aktualisht e mban Majkëll Xhordani, me 32 mijë e 292 pikë, vetëm 291 pikë më shumë se Kobi.
Ndërkohë, më i miri i të gjitha kohërave vazhdon të jetë Karim Abdul-Xhabari, me afro 39 mijë pikë, ndërsa i dyti në këtë renditje është Karl Maloni, me mbi 36 mijë pikë. Me 36 vjet mbi supe, Kobi Brajënt do ta ketë të vështirë që t’i arrijë dy të parët.
Por kjo natyrisht do të varet edhe nga koha kur ai do të vendosë të dalë në pension, pasi, përsa sa i përket formës fizike dhe lojës, ai nuk di të ndalet dhe është i jashtëzakonshëm në çdo edicion.
