ASNN – Pas përfundimit të fazës së saj eliminatore, Liga e Kampioneve ka përvijuar të enjten edhe betejat e fazës së saj më interesante, asaj të grupeve, shorti i së cilës u hodh në Monako. Padyshim, një nga grupet më të forta është grupi H, ku kampionia në fuqi e Evropës, Reali i Madridit, do të sfidohet nga dy skuadra interesante si Borusia e Dortmundit dhe Totenhemit.
Veprimtaria më prestigjioze e futbollit në Evropë, Liga e Kampioneve, ka hedhur të enjten në mbrëmje shortin e fazës së saj të grupeve, duke përvijuar edhe betejat kryesore në kërkim të trofeut më të çmuar të “topkëmbës” kontinentale. Padyshim, një nga grupet më të forta është grupi H, ku kampionia në fuqi e Evropës, Reali i Madridit, do të sfidohet nga dy skuadra interesante si Borusia e Dortmundit dhe Totenhemit.
Një tjetër grup interesant është grupi C, ku kampionia e Anglisë, Çellsi, do të përballet me Atletikon e Madridit dhe Romën, ndërsa 4-shen e plotëson skuadra azere e Karabagut, ku militon edhe kapiteni i Kombëtares kuqezi, Ansi Agolli. Një tjetër ish-kapiten i Kombëtares, Besnik Hasi, tanimë trajner i Olimpiakosit, do të ketë një detyrë të vështirë në grupin D, ku do të përballet me gjigandët e futbollit kontinental, Barcelonën, Juventusin, por edhe Sportingun e Lisbonës.
Sa u përket grupeve të tjera, në grupin A, Mançester Junajtid do të sfidohet nga Benfika, Bazeli dhe CSKA-ja e Moskës, në grupin B, Bajerni i Mynihut dhe Paris SG-ja shkojnë si favoritë kundrejt Anderlehtit dhe Sëlltikut, ndërsa më i barazpeshuar është gruëpi E, ku përballen me njëra-tjetrën Spartaku i Moskës, Sevilja, Liverpuli dhe Maribori.
Po kështu të barazpeshuar duken edhe grupet F dhe G, ndërsa ndeshjet e fazës së grupeve të Ligës së Kampioneve luhen nga data 12 shtator 2017, deri më 6 dhjetor 2017, ndërsa në përfundim të tyre hidhet edhe shorti i turit të 16-shes, që luhet vitin që vjen dhe gjithçka kulmon me finalen e madhe të 26 majit 2018 në Kiev.
