ASNN – Trajneri Taip Ramadani nuk e di forcën e vërtetë të përfaqësueses që të përzgjedhurit e tij do ta kenë përballë. Ramadani po ashtu nuk mund të llogarisë në disa lojtarë të rëndësishëm. Por, sipas asaj që raportojnë mediat e Kosovës, këto nuk e pengojnë trajnerin e përfaqësueses së Kosovës në hendboll për meshkujvqë për ndeshjen me Estoninë të synojë fitore.
Do të ishte kjo fitorja e parë e përfaqësueses së Kosovës në hendboll në Eliminatoret për Kampionate Botërore apo Evropiane. Më 4 janar 2017, në Palestrën “Shani Nushi” në Gjakovë, duke nisur nga ora 19:30, Kosova përballet me Estoninë, në fazën e parë eliminatore për Evropianin e vitit 2020. Trajneri Ramadani, ka publikuar ditët e fundit listën me emrat e lojtarëve në të cilët llogarit për ndeshjen e 4 janarit 2017.
E njëjta listë vlen edhe për ndeshjen tjetër me Estoninë, që zhvillohet më 8 janar 2017 në qytetin estonez Polva. Kosova bën pjesë në Grupin B të fazës së parë eliminatore për Evropianin e vitit 2020. Ajo tashmë i ka luajtur dy ndeshje me Turqinë, në fillim të nëntorit. Në Turqi humbi 22-26, ndërsa në Kosovë barazoi 24-24. Ishte ky barazimi i parë, por edhe pika e parë e Kosovës në Eliminatore.
