Interi vazhdon të zhgënjejë në Evropë, ndërsa në përballjen e mbrëmshme në “San Siro” ndaj Hapoel Bir Shevës, në mënyrë krejt surprizë, ka rënë. Ka vijuar kështu skuadra e holandezit De Bur të vazhdojë serinë e rezultateve negative, që në fakt kanë nisur që në miqësore, kur dhe u largua Mançini, e kanë vijuar në kampionat.

Për t’u evidentuar është fakti se tek Hapoel Ber-Sheva kanë luajtur tre futbollistë të përfaqësueses së Izraelit, që do të jetë kundërshtari i Shqipërisë në Eliminatoret e Kampionatit Botëror “Rusi 2018”. Bëhet fjalë për portierin Goresh dhe lojtarët Biton e Tzedek, ndërsa Davidzada ka qenë rezervë.

Që do të thotë se Izraeli do të jetë një kundërshtar i vështirë për kuqezinjtë. Nëse pjesa e parë ka përfunduar pa gola, ndërsa izraelitët e kanë frenuar lojën e interistëve me ashpërsi, teksa gjyqtari Kehlet i ka ndëshkuar me kartonë të verdhë, në të dytën ka një tjetër spektakël.

Në minutën e 54-ët, Migel Vitor hap “rubinetin” e golave për izraelitët duke e kaluar në avantazh skuadrën e Bir Shevës, ndërsa është goli i tij i parë për izraelitët. Në fakt ka qenë një goditje këndi, para ekzekutimit të këndores ka dhe shtyrje të dy lojtarëve të Interit, por që për danezin është gjithçka e rregullt.

Dhe Vitor shënon shumë pranë Handanoviçit. Hapoel Bir Sheva merr zemër dhe Buzaljo me një goditje dënimi perfekte e dërgon topin në krahun e djathtë të Handanoviç e 2-0. Në fushë futet edhe Ikardi dhe Interi shton presionin. Madje Eder godet shtyllën.

Por, në kundërsulm Hapoel Bir Sheva mund të kishte shënuar dhe golin e tretë, ndërsa Biton ka goditur traun. Përfundimisht 2-0 për Hapoel Bir Shevën, që befason kështu Interin, i cili është gjendur nën fishkëllimat ironike të tifozëve. Edhe Morati në tribunë ka mbetur i shokuar.