ASNN – I pyetur nga gazetarët nëse kjo vizitë ka lidhje edhe me kandidimin e tij për postin e anëtarit të Komitetit Ekzekutiv të UEFA-s, presidenti i Federatës Italiane të Futbollit (FIGC) deklaroi: “Jo, sot nuk duam të merremi me politikë. Mund të flisnim edhe në telefon për këtë çështje. Prania ime këtu është një formë respekti për z. Duka, sepse e meriton e sepse bashkëndajmë një rrugëtim të rëndësishëm, por mbi të gjitha sepse unë besoj që Italia, Shqipëria dhe futbolli duhet të zbulojnë edhe kuptimin e të qenit së bashku.”

“Nuk mund të humbasim ato që janë momentet e ekzaltimit të sportit tonë, duke jetuar vetëm kompeticionet sportive, – ka vijuar ai. – Kemi nevojë të takohemi nga afër. Kemi qëndruar bashkë mbrëmë në një atmosferë të shkëlqyer, sot do të kalojmë një tjetër ditë bashku dhe më lejoni të them se kjo është forca e ndjenjës së madhe që na bashkon.” Pyetjes se çfarë do të bëhet me futbollistët e rinj shqiptarë, të cilët aktivizohen në Itali dhe që kanë probleme me dokumentacionet, Gravina u shpreh optimist për një zgjedhje.

“Është një problem i vërtetë, për fat të keq burokracia është një nga elementët që bllokon mundësitë për të luajtur për shumë të rinj, – ka pohuar ai. – Komuniteti më i rëndësishëm në Itali që praktikojnë sportin, është ai shqiptar. Janë rreth 14 mijë futbollistët shqiptarë që luajnë për klube italiane dhe duhet të përshpejtuar ky proces. Unë uroj që me qeverinë italiane të mund të gjenden modalitetet e duhura për të përshpejtuar hapat.” Ai është pyetur edhe sa i përket mundësisë për të organizuar një miqësore mes Shqipërisë dhe Italisë në të ardhmen e afërt.

Gravina u shpreh se dëshira është e madhe, por kalendari i ndeshjeve ndërkombëtare të UEFA-s nuk lë hapësira për momentin. “Do të kisha shumë dëshirë të bëhej, ne kemi dy ndeshje mes ekipeve kombëtare të grupmoshës së Nën-19-vjeçare në muajin gusht, – ka thënë ai. – Për fat të keq kalendari i ndeshjeve ndërkombëtare na impenjon që të dyja vendet në garat zyrtare. UEFA i ka organizuar tashmë kampionatet zyrtare, por po përpiqemi të përdorim kompeticionet e moshave për të gjetur një mundësi për t’u ndeshur në fushë.”