ASNN – Sipas të gjitha gjasave, pas Xherdan Shaqirit edhe Granit Xhaka ka mundësi të zbarkojë në Itali. Sepse, sipas të përditshmes së mirënjohur sportive italiane “Gazzetta dello Sport”, është skuadra tjetër, ajo kuqezi e qytetit të Milanos, që ka shfaqur interesim për mesfushorin nga Prishtina.

Ekipi nga “San Siro” është në kërkim të një mesfushori dhe duket se karakteristikat e lojtarit aktual të Borusias së Mënshengladbahut, janë pikërisht ato çfarë kërkon trajneri i Milanit, Filipo Inzagi. 22-vjeçari ka kontratë me ekipin e Bundesligës së parë deri në verën e vitin 2016.

Vetëm pak ditë më parë mediat gjermane raportonin, drejtuesit e klubit gjerman po mundoheshin ta zgjatnin kontratën me Granit Xhakën, edhe duke përfituar nga fakti se ky i fundit ka shprehur gatishmërinë që t’i mbetet besnik skuadrës. Por një një ofertë konkrete nga gjiganti italian mund t’ia ndryshojë mendjen ish-futbollistit të Bazelit.

Granit Xhaka ka një kontratë me Borusian e Mënshengladbahut deri në verën e vitit 2016. Dhe prestigjiozja gjermane, “Kicker”, shkruante se kjo i ka shtyrë drejtuesit e klubit që të nisin përpjekjet për të vazhduar bashkëpunimin me mesfushorin kosovar të përfaqësueses zvicerane.

“Granit Xhaka është një djalë i mirë që ka marrë një zhvillim fantastike, – pati deklaruar para pak ditësh drejtori sportiv i skuadrës, Maks Eberl. – Ai ka kontratë edhe për një vit e gjysmë, me opsion vazhdimi edhe për një tjetër. Por, pavarësisht kësaj ne po punojmë që të nënshkruajmë kontratë afatgjate.”

Ndërsa nga ana tjetër, duke folur për median gjermane në fjalë, vetë futbollisti Granit Xhaka ka deklaruar: “Kam pasur disa oferta, por asnjëherë nuk ishte qëllimi që të largohem nga skuadra e Borusias. Unë mund ta imagjinoj të ardhmen time në Mënshengladbah.” Mbetet për t’u parë deri në fund të janarit se çfarë do të ndodhë.