ASNN – Ndërkohë që në grupin A, apo grupin e Veriut, do të luhet edhe një javë e fundit, në grupin B, apo ate të Jugut, Gramshi e ka mbyllur me spektakël aventurën e tij në Kategorinë e Dytë dhe sezonin e ardhshëm do të jetë pjesë e Kategorisë së Parë.

Skuadra e drejtuar nga Luan Metani e kishte siguruar prej tri javësh biletën e ngjitjes dhe dje e ka kthyer në stërvitore sfidën ndaj Gramozit ku ka fituar 5-1. Skuadrës i është dorëzuar dje trofeu i kampionit për Grupin B.

Pas disa ditësh, gramshakët do të luajnë një finale ndaj Korabit të Grupit A për të përcaktuar ekipin “kampion” të Kategorisë së Dytë. Pas ndeshjes, trajneri i Gramshit, Luan Metani, u shpreh: “Jam tepër i emocionuar, pas gjithë këtij rrugëtimi të gjatë, por vëmendja ime është te finalja ndaj Korabit”.

“E njoh mirë atë ekip dhe besoj se ne do ia dalim mbanë”, shtoi trajneri kryeqytetas i gramshakëve. Ndërsa kryebashkiaku Dritan Bici deklaroi: “Ky ekip do të ketë mbështetjen time deri në shpalljen “kampion” të Kategorisë së Dytë”.

“Jam i bindur që do të realizojmë këtë objektiv, duke arritur këtë sukses për ekipin tonë. Falënderoj të gjithë ekipin, pasi ka bërë një punë të palodhur”, – përfundoi titullari administrativ i skuadrës së Gramshit.

Në takimet e tjera, Turbina nuk ka falur në shtëpi, ku ka triumfuar 2-1 ndaj Përmetit dhe cërrikasit presin tani takimin e “play-out”-it, ndërsa Egnatia ka dalë huq në shtëpi, teksa është mundur nga Orikumi me rezultatin 4-0.

Delvina e ka mbyllur në mënyrën më të mirë të mundshme sezonin, teksa ka mundur Himarën me rezultatin 3-1. Kurse derbi Tepelena-Memaliaj nuk i shpëtoi lojës së fortë e kartonëve të shumtë, pavarësisht se të dy ekipet nuk kishin asnjë synim në këtë sfidë.

Dhe, së fundi, ndonëse i kishte thënë lamtumirë Kategorisë së Parë, Këlcyra e mbyll aventurën me fitore duke mundur në fushën e vet Bilishtin 4-3.

Kategoria e Dytë

Grupi B

Java e 22-të

(10 maj 2015)

GRAMSHI – GRAMOZI                    5-1

TURBINA – PËRMETI                     2-1

TEPELENA – MEMALIAJ                0-2

DELVINA – HIMARA                        3-1

EGNATIA – ORIKUMI                      0-4

KËLCYRA – BILISHT SPORTI       4-3

Renditja

Nr.       Skuadra                     N.        F.         B.        H.        Gsh-Gp          Pikë

1. Gramshi 22        18        4          0        53-15              58
2. Turbina Cërrik 22        14        4          4        37-17              46
3. Oriku 22        13        3          6        39-21              42
4. Memaliaj 22        12        3          7        33-23              39
5. Tepelena 22        9        6          7        41-33              33
6. Bilisht Sporti 22        8        3          11        33-36              27
7. Delvina 22        8        1          13        28-31              25
8. Himara 22        8        1          13        34-40              25
9. Egnatia Rrogozhinë 22        7        2          13        24-37              23
10. Gramozi Ersekë 22        6        4          12        25-47              22
11. Përmeti 22        6        3          13        22-36              21
12. Këlcyra 22        5        2          15        19-52              17