ASNN – Kampionati Kombëtar i Basketbollit për Femra do ta vendosë fituesen e këtij sezoni vetëm në ndeshjen e pestë dhe të fundit të finales së “play-off”-it për titullin “kampion”.
Goga Basket e ka fituar ndeshjen e 4-t në fushën e saj ndaj Flamurtarit, duke bërë që rezultati i përgjithshëm të barazohet në 2-2 dhe gjithçka tanimë do të vendoset të premten në Vlorë.
Është luajtur të martën takimi i radhës i vlefshëm për finalen e “play-off”-it për titullin “kampion” dhe Goga Basket e ka fituar ndeshjen e katërt me Flamurtarin me vetëm dy pikë diferencë, 64-62, duke bërë që e premtja të jetë vendimtare për fatet e sezonit 2015-2016 në basketbollin e femrave.
Ndeshja e së martës është luftuar pikë për pikë, edhe për faktin se për vendaset paraqiste shansin e fundit për të shpresuar për titullin. Goga Basket e ka fituar pjesën e parë 14-12, Flamurtari kundërpërgjigjet në të dytën, duke e fituar atë 21-18 dhe duke shkuar në pushimin e ndeshjes me një pikë epërsi, 33-32.
Fatin e këtij takimi do ta vendosë 10-minutëshi i tretë, të cilin skuadra vendase, e drejtuar nga trajneri Astrit Greva dhe ndihmësi i tij, Vladimir Xheka, e fiton me shifrat 21-14.
Ndonëse ekipi mik, i drejtuar nga trajneri Viron Toska, do ta fitojë pjesën e katërt 15-11, kjo nuk mjafton për t’i mohuar Goga Basketit fitoren e ngushtë, me rezultatin 64-62. Tanimë, gjithçka do të vendoset të premten në Vlorë.
Kampionati Kombëtar
i Basketbollit – Femra
Kalendari i “play-off”-it
për titull “kampion”
Kategoria e Parë
Finalet:
20 maj 2016:
Flamurtari – Goga Basket 83-53 (1-0)
(24-8, 17-14, 22-13, 20-18)
Pallati i Sportit “Flamurtari”, Vlorë
24 maj 2016:
Goga Basket – Flamurtari 68-57 (1-1)
(10-16, 19-14, 16-14, 23-13)
Pallati i Sportit “Ramazan Njala”, Durrës
27 maj 2016:
Flamurtari – Goga Basket 77-69 (2-1)
(26-11, 22-13, 10-17, 19-28)
Pallati i Sportit “Flamurtari”, Vlorë
31 maj 2016:
(nëse do të ishte e nevojshme)
Goga Basket – Flamurtari 64-62 (2-2)
(14-12, 18-21, 21-14, 11-15)
Pallati i Sportit “Ramazan Njala”, Durrës
3 qershor 2016:
(nëse do të jetë e nevojshme)
Flamurtari – Goga Basket ora 18:00
Pallati i Sportit “Flamurtari”, Vlorë
