ASNN – Huligani famëkeq, Ivan Bogdanov, “u fut në fushën e blertë për të qetësuar gjakrat” në ndeshjen e ndërprerë të 14 tetorit 2014 midis Serbisë dhe Shqipërisë. Ky është vendimi qesharak i drejtësisë serbe, që e ka mbyllur kështu këtë çështje, vetëm pak ditë para se Gjykata e Arbitrazhit Sportiv (KAS), të vendosë mbi apelin që Shqipëria dhe Serbia kanë bërë në këtë instancë të drejtësisë sportive ndërkombëtare.

Procesi gjyqësor, i hapur nga drejtësia serbe lidhur me ngjarjet e 14 tetorit 2014, kur takimi i Beogradit, i vlefshëm për Eliminatoret e “Euro 2016”-s, midis përfaqësueses vendase dhe Shqipërisë, u ndërpre në minutën e 41-të për shkak të dhunës së ushtruar nga tifozeria vendase ndaj Kombëtares kuqezi, është mbyllur ditët e fundit, me një konkluzion qesharak.

Në mënyrë të turpshme, drejtësia e ka mbyllur këtë çështje penale, që kishte në qendër të saj huliganin famëkeq, Ivan Bogdanov, duke e lënë atë të lirë. Gjykata në Beograd është mjaftuar me dëshminë e dy policëve të thjeshtë, në morinë e mijëra policëve dhe forcave speciale që ishin të pranishëm në stadiumin e Partizanit, të cilët kanë deklaruar se Bogdanovi nuk ishte protagonist i ngjarjeve në fushën e blertë.

Madje, sipas tyre, huligani famëkeq, që në vitin 2010 ishte protagonist i trazirave në Xhenova që çuan në ndërprerjen e ndeshjes Itali-Serbi, u fut në fushën e blertë për të qetësuar gjakrat dhe jo për të kërcënuar stafin dhe futbollistët kuqezi. Ky vendim qesharak i drejtësisë serbe, që e ka mbyllur kështu këtë çështje, vjen pak ditë para se Gjykata e Arbitrazhit Sportiv (KAS), të vendosë mbi apelin që Shqipëria dhe Serbia kanë bërë në këtë instancë të drejtësisë sportive ndërkombëtare.