Paraqitja mjaft e mirë e gjimnastikës shqiptare në turneun e Sllovenisë ka tërhequr vëmendjen e trajnerëve dhe specialistëve përkatës pjesëmarrës të kësaj veprimtarie, të cilët nuk kanë nguruar të përcjellin vlerësime maksimale për gjimnasten 19-vjeçare Reçi. Ata theksuan për të se perspektiva e saj është për nivele edhe më të larta dhe, konkretisht, sipas tyre në edicionin e ardhshëm të këtij turneu ajo do të jetë patjetër pretendentja kryesore për fitimin e medaljes së artë si individë.

Por, krahas kësaj, nuk kanë munguar edhe komplimentet edhe për ekipin shqiptar në tërësi. Në bisedat që organizatorët zhvilluan pas veprimtarisë me trajnerin Limaj dhe presidentin Lulaj kanë bërë me dije se falë këtyre paraqitjeve dinjitoze, në dy pjesëmarrjen e fundit ku Shqipëria ishte e pranishme, ftesat për gjimnastet kuqezi nuk do të mungojnë edhe për edicionet e ardhshme.

Ky është një lajm shumë i mirë për gjimnastikën shqiptare, por në të njëjtën kohë edhe një obligim dhe përgjegjësi më tepër e trajnerit të kombëtares Vladimir Limaj si dhe Federatës Shqiptare të Gjimnastikës, me në krye presidentin Leonard Lulaj, për të bërë më të mirën e tyre në mbështetje të këtyre vajzave të talentuara, të cilat kanë marrë përsipër rikthimin e gjimnastikës shqiptare në nivelet e larta.