ASNN – Dhunohet fizikisht gazetari sportiv i TeleSportit, Eduart Ilnica. Sipas të dhënave fillestare, autori i dhunës është presidenti i Klubit të Futbollit “Kastrioti” të Krujës, Alban Vogli. Pas ngjarjes, presidenti i Kastriotit, Vogli është arrestuar dhe po hetohet për tre vepra penale.
Një ngjarje e shëmtuar ka ndodhur të hënën në orët e vona të mbrëmjes në Tiranë, teksa është dhunuar fizikisht, gazetari sportiv i TeleSport, Eduard Ilnica. Ka qenë presidenti i Klubit të Futbollit “Kastrioti” të Krujës, Alban Vogli, ai që e ka goditur me mjete të forta gazetarin Ilnica.
“Shkaku ka lidhje me ndeshjen në Peshkopi ku unë isha i pranishëm si gazetar sportiv, por edhe si “vendali”, – ka rrëfyer ai. – Por shkrimet e mia duket se nuk janë pritur mirë. Unë e kam dënuar dhunën e tifozëve, është papjekuri. Unë kam pasqyruar vetëm pamje në telesport.al, asgjë më shumë, asnjë koment më shumë.”
“Po i drejtohesha makinës. Në atë moment kam parë një grup personash të udhëhequr nga Alban Vogli, emrin e të cilit e mësova në stadiumin e Peshkopisë, – ka vijuar gazetari sportiv. – Kurrë më parë në jetën time nuk e kisha parë dhe nuk e kisha dëgjuar. E kam parë sepse ishim në tribunë dhe kërceu 4 metra për të hyrë në fushë.”
“E kam njohur përmes hulumtimeve kush ishte ky person, – ka vijuar Ilnica. – Ndoshta citimi i emrit të tij në Telesport bëri që ky ta merrte personalisht. Unë nuk e kam njohur kurrë në jetën time. Nuk pata kohë të reagoj. Dy minuta më kanë goditur pa fund. Mund të ishin 4-5 persona, ndoshta edhe më shumë.”
“Duket se shkak për dhunën e ushtruar ndaj gazetarit sportiv Eduart Ilnica është bërë një artikull I tij për ngjarjet pas ndeshjes Korabi-Kastrioti të luajtur të shtunën. Për këtë ngjarje ka reaguar edhe kryetari I Unionit të gazetarëve, Aleksander Çipa.
