ASNN – “Futbollisti Më i Mirë në Botë” për vitin 2016 do të përcaktohet sot në mbrëmje gjatë ceremonisë që do të zhvillohet në Zyrih. Ronaldo, Mesi dhe Grizman janë tre kandidatët kryesorë për të marrë këtë çmim. “FIFA World Player of the Year”, pra “Futbollisti Më i Mirë për vitin 2016” do të zgjidhet sot në ceremoninë që do të organizohet në Zyrih dhe që do të transmetohet drejtpërdrejt në Rrjetin e Radio-Televizionit Shqiptar, duke nisur nga ora 18:30.
Aktorja amerikane Eva Longoria dhe gjermani Marko Shreil do të prezantojnë këtë program special sportiv. Midis kandidatëve për të fituar çmimin si futbollisti më mirë në botë për 2016, janë Kristiano Ronaldo, Lionel Mesi dhe Antuan Grizman. Ndërsa për femra kandidojnë: Melani Behringer (Bajern Mynih / Gjermani), Karli Llojd (Hjuston Desh / SHBA) dhe Marta (FC Rosengard / Brazil). Më pas do të përcaktohet trajneri më i mirë në botë.
Tre kandidaturat finaliste janë Klaudio Ranieri (Leister Siti / Angli), Fernando Santos (Portugali) e Zinedin Zidan (Real Madrid / Francë). Për femra kandidojnë: Xhill Elis (SHBA), Silvia Neid (Gjermani) e Pia Sundhage (Suedi). Për çmimin “Pushkash”, që përcakton golin më të bukur, në garë janë: Marlone, Daniuska Rodrigez e Mohd Faiz Subri. Më pas do të përzgjidhet edhe formacioni më i mirë i 2016-ës, ku 11 më të mirët nga 23 kandidatë gjithsej.
Ceremonia vazhdon me çmimin lojës së ndershme, “FIFA Fair Play”, dhe atë të tifozëve, “FIFA Fan”. Një çmim i ri ky për sjelljet e veçanta të tifozëve, midis të përzgjedhurve janë tifozët e ADO Den Hagut në Holandë, të Borusias së Dortmundit dhe Liverpuli dhe ata të përfaqësueses së Islandës. Për futbollistin, futbollisten, trajnerin e trajneren më të mirë kanë qenë përcaktuese 50 % nga votat e kapitenëve dhe trajnerëve të ekipeve përfaqësuese nga e gjithë bota, të ndara nga 25 % secila.
50 %-ëshi i mbetur është e ndarë në mënyrë të barabartë në mes të një votimi në internet nga tifozët e futbollit dhe një grupi të përzgjedhur të përfaqësuesve të medias.