ASNN – Ndeshja e dytë gjysmëfinale e Kupës së Shqipërisë në Futbollin e Sallës, e zhvilluar dje në Pallatin e Sportit “Qazim Dervishi” të Shkodrës, ishte ajo midis Vllaznisë dhe KS “Ali Demit”. Vllaznia shfaqi shumë grintë, ego dhe dëshirë për ta fituar ndeshjen, por KS “Ali Demi” nuk lejoi një hap fals. Bllumbi për miqtë zë dy herë në befasi Vllazninë në minutat 8 dhe 10, duke çuar shumë shpejt në 2-0 epërsinë e kryeqytetasve.
Vendësit hutohen pak dhe e kanë të vështirë të dalin në lojën e tyre. Pjesa e parë mbyllet kështu me rezultatin 2-0 në favor të KS “Ali Demit”. Kur pritej reagimi i Vllaznisë, është skuadra “alidemse” që realizon golin e tretë përmes Pajës, 4 minuta pas fillimit të pjesës së dytë. Pavarsisht disavantazhit, shkodranët nuk lëshojnë në lojën e tyre dhe Vllaznia fiton një penallti.
Çela godet fuqishëm, por gjuajtja e tij është qendrore dhe përplaset në trupin e portierit mik pa arritur të përfundojë në rrjetë. Humbja e penalltisë dëshpëron kuqeblutë. Paja shënon edhe një gol tjetër, duke e çuar në 4-0 rezultatin për miqtë kryeqytetas dhe duke mbyllur llogaritë praktikisht. Goli i Pishtarit në minutën e 34-t për vendasit kuqeblu është për statistikë.
Paja realizon edhe golin e pestë, duke shuar shpresat e Vllaznisë për një barazim të mundshëm. Krejt ndeshja mbyllet 6-3 me fitoren e Ali Demit ndaj një Vllaznia që nuk ishte në ditën e saj. Kështu, Ali Demi kalon në finale të Kupës dhe do të përballet me Flamurtarin që eliminoi Teutën dhe kjo ndeshje do të luhet ditën e diel, kur do të ulet edhe sipari i veprimtarisë së dytë të futbollit të sallës në Shqipëri.
Vllaznia – KS Ali Demi 3-6
Shënues: Pishtari 34’, Mandi 38’, Çoba 40’ /
Bllumbi 8’ 10’, Paja 24’, 31’, 36’, Gockaj 39’
Vllaznia: Behari, Paçrami, Meta, Alibali, Pishtari (U aktivizuan: Çela, Mlloja, Mandi, Gokaj, Çoba). Trajner: A. Behari
KS “Ali Demi”: Meçikariç, Bejallari, Bllumbi, E. Kaca, Baroviç (U aktivizuan: Veli, Thanasi, Paja, Gocka, E. Kaca, Kadiu). Trajner: E. Kadiu
Kartonë të verdhë: Mlloja 25’, Çela 40’
Gjyqtarë: K. Hakrama, A. Bixhi
Kupa e Shqipërisë
Futbolli i Sallës
Gjysmëfinalet:
(7 maj 2015)
Flamurtari – Teuta 8-2
Vllaznia – KS “Ali Demi” 3-6
Finalja:
(10 maj 2015)
Flamurtari – KS “Ali Demi”
