Tirana shpërthen në Pallatin e Sportit “Asllan Rusi”, teksa ka shënuar plot 13 gola në portën durrsake. Një ndeshje pa shumë vlera, sepse Teuta është paraqitur me vetëm gjashtë lojtarë, pesë në formacion dhe një rezervë, kurse mungesa e Fisnik Bllacës për shkak dëmtimi duket se ka qenë evidente në lojën e “Djemve të detit”. Haçkovija dhe Bllaca kanë qenë shumë pak për t’i bërë rezistencë Tiranës, e nëse do të kishte më shumë kohë në dispozicion, Tirana do të mund të kishte shënuar dhe më shumë se 13 gola.

Teuta ka rezistuar deri në barazimin 2-2 e më pas ka ardhur rënia e saj. Bylyku, Sina, Xhaferraj bëhen shtysë për të tjerët për të shënuar në portën e Teutës, ndërsa Mullai e Voga kanë vulosur rezultatin 13-4. Ka shënuar dy gola Haçkovija, këto krahas Ivi Bllacës dhe Hotit, por të gjitha këto gola të durrsakëve kanë vlejtur për statistikë. Ndërkohë ajo që duhet thënë është fakti se ndeshja ka nisur me gati 30 minuta vonesë, sepse përgjatë gjithë ditës, në sallën kryesore të Pallatit të Sportit “Asllan Rusi”, kanë qenë “Dëshmitarët e Jehovait”.

E jo vetëm kaq, por gjatë pjesës së dytë, teksa kishin mbetur dhe 11 minuta lojë, ka pasur dhe një bllokim të tabelës elektronike, e cila e ka detyruar ndërkombëtarin Hakrama që të vendosë orën në dorë për të mbajtur kohën. Megjithatë përtej këtyre defekteve, në përgjithësi ka qenë një ndeshje e qetë, pas së cilës ka ardhur dhe fitorja e thellë e Tiranës, 13-4. Bardheblutë janë në krye, sepse Flamurtari e ka shtyrë ndeshjen e tij në Shkodër për shkak të angazhimit në Kupën “Adem Jashari”, kurse KS Ali Demi ka rënë për herë të dytë në këtë kampionat, teksa është mundur 4-1 nga Edro Vlora.

Tirana – Teuta                                               13-4

Shënues: Sina 2’, 33’, 35’, 36’, Bylyku 13’, 15’, 24’,

Xhaferraj 19’, 38’, 39’, Mullai 26’, Voga 40’, 40’ /

I. Bllaca 12’, Hoti 14’, Haçkovija 23’, 34’

Tirana: Enesi, Sina, Bylyku, Mullai, Voga / H. Hoxha, Lika, Xhaferraj. Trajner: A. Angoni

Teuta: Priu, Haçkovija, I. Bllaca, Rigo, Hoti / Mustafaraj. Trajner: O. Gushaj

Gjyqtarë: K. Hakrama, S. Minxholli (Tiranë)

Karton i verdhë: Bylyku

Kampionati i 12-të Kombëtar

i Futbollit të Sallës

Java e 9-të

(1 mars 2015)

Tirana – Teuta                                              13-4

Edro Vlora – KS Ali Demi                           4-1

Black Sheep – Universiteti Epoka            0-3      (në tavolinë)

Vllaznia – Flamurtari                                   (e shtyrë)

Renditja

Nr.       Skuadra                     N.        F.         B.        H.        Gsh-Gp          Pikë

1. Tirana             9          6          2          1          64-30              20
2. Flamurtari             8          6          1          1          61-20              19
3. KS Ali Demi             9          6          1          2          41-34              19
4. Edro Vlora             9          5          0          4          29-36              15
5. Vllaznia             8          4          2          2          45-27              14
6. Teuta             9          3          0          6          36-55              6
7. Universiteti Epoka 9          1          0          8          42-89              3
8. Black Sheep 9          1          0          8          15-42              0

Shënim: “Black Sheep” me vendim të Komisionit të Disiplinës është përjashtuar nga kampionati.