ASNN – Bardheblutë e Artur Angonit kanë mundur në finale KS Ali Demin, 7-1, dhe rikthehen pas dy vjetësh tek trofeu i munguar në futbollin e sallës. KS “Ali Demi” e ka nisur shpejt, ndërsa me pasime të shpeshta e ngushton Tiranën në zonën e saj. Godet, por herë Rrapi e herë pasaktësia e lojtarëve të Ergys Kadiut shmangin pësimin e golit. Dhe atëherë kur nuk pritej shënon Tirana.
Brahimi në të 4-tën minutë, në një goditje këndi në të majtë të sulmit bardheblu, e gjen Beharin të pavendosur mirë dhe e dërgon topin në rrjetë. Tirana i lë fushë-veprimi KS “Ali Demit”, që duket sikur dominon kur luan topin sa majtas e djathtas. Por vetëm kaq. Godet fillimisht Endrit Kaca, kapiteni i Tiranës, që realizon në minutën e 15-të, dhe, më pas, Bajollari në të 19-ën dhe pjesa e parë përfundon 3-0.
Tirana administron mirë rezultatin, kurse Brahimllari gjen përsëri të papërgatitur Beharin dhe realizon golin e katërt në minutën e 29-të. E gjithë skuadra e KS “Ali Demit” është në sulm, ndërsa Behari bën dhe portierin-lojtar. Por nuk fal Tirana. Shënon Moçka në të 33-tën minutë, Alibegu nga gjysmëfusha e tij 4 minuta më pas dhe, vetëm një minutë më vonë, përsëri Brahimi dhe 7-0.
Goli i nderit për KS Ali Demin ka ardhur nga fundi i lojës prej Spahiut dhe në përfundim 7-1. Kupën kapitenin Endrit Kaca dhe medaljet për Tiranën i ka shpërndarë anëtari i Komitetit Drejtues të Federatës Shqiptare të Futbollit, Abdyl Kuriu.
Tirana – KS “Ali Demi” 7-1
Shënues: Brahimi 4’, 29’, 38’, En. Kaca 15’,
Bajollari 19’, Moçka 33’, Alibegu 37’ / Spahiu 39’
E diel, 3 qershor 2018, ora 19:00
në Pallatin e Sportit “Asllan Rusi”
Tirana: Rrapi, En. Kaca, Gashi, Brahimi, Halimi / Xhaferraj, Moçka, Alibegu, Bajollari. Trajner: A. Angoni
KS “Ali Demi”: Behari, Spahiu, Çaushaj, Vukoviç, Aloviç / Pajo, Rakiç, Lami, Filaj, Vogli, Voga, Veli. Trajner: E. Kadiu
Gjyqtarë: K. Hakrama, A. Stolaj (Tiranë)
Kartonë të verdhë: Halimi / Pajo, Aloviç, Lami
