ASNN – Kosova dhe Shqipëria do të ndeshen me njëra-tjetrën në paraeliminatoret e “Botërorit 2019” të futbollit të femrave, por, asnjëra nga përfaqësueset e dy shteteve shqiptare nuk e dinë se cilat futbolliste do t’i kenë në dispozicion në sfidat që i presin në muajin prill. Kjo pasi, deri më tani, për Shqipërinë kanë luajtur një numër i madh i vajzave nga Kosova, e cila debuton për herë të parë në arenën ndërkombëtare.
Siç dihet, rregullat e UEFA-s nuk lejonin që djemtë kosovarë të Shqipërisë t’i bashkoheshin përfaqësueses së Kosovës pasi paraprakisht ata i kishin mbrojtur ngjyrat kuqezi në “Euro 2016” pas anëtarësimit të Kosovës në UEFA e FIFA. Procedurave të njëjta duhet t’u nënshtrohen edhe femrat që planifikojnë t’i bashkohen Kosovës, por, ndryshe nga meshkujt, sipas gjasave, shumica e tyre do të kenë të drejtë t’i bashkohen Kosovës.
Kjo, sepse ato nuk kanë marrë pjesë në ndonjë garë të nivelit aq të lartë me Shqipërinë pas ndërkombëtarizimit të futbollit kosovar. “Me përzgjedhjen e lojtareve, formacionin dhe gjëra të tilla merret përzgjedhësja e Kosovës varësisht, siç vlerëson ajo, se sa i duhen ato vajza skuadrës sonë përfaqësuese, – ka thënë për të përditshmen “Zëri” anëtarja e Komitetit Ekzekutiv të Federatës së Futbollit të Kosovës (FFK), Vjollca Krasniqi.
“Por, kjo varet edhe nga vullneti i futbollisteve se a duan të luajnë për Kosovën apo të vazhdojnë për Shqipërinë, – ka vijuar ajo. – Për ne gjëja më e mirë do të ishte që ta kemi një skuadër sa më të kompletuar, duke përfshirë edhe vajzat nga Kosova që aktualisht janë pjesë të Shqipërisë, por ne nuk mund t’u përzihemi në vendimmarrjet e tyre për karrierën e tyre.”
“Por, megjithatë i mbetet trajneres tonë të merret me këtë çështje”, – theksoi Krasniqi, duke shtuar se FFK-ja nuk e ka pritur mirë shortin, për shkak të pranisë së Shqipërisë në të njëjtin grup. Janë mbi 15 vajza kosovare, të cilat kanë veshur deri më tani ngjyrat e Shqipërisë, e cila edhe sot në radhët e veta ka mbi 10 lojtare nga ose me prejardhje nga Kosova.
