ASNN – Janë mbyllur të dielën ndeshjet e prapambetura të vlefshme për Kupën e Shqipërisë dhe ndeshja e parë çerekfinale mes Vllaznisë dhe Juban Danjës. Partizani ka fituar ndeshjen kundër Akademisë AAS, në një përballje historike për të kuqet, të cilat u kualifikuan për herë të parë në çerekfinale, ku shorti i ka përcaktuar përballë pikërisht Tiranën.

Begallo hapi sfidën në minutën e 18-të për Partizanin, duke kaluar në epërsi të kuqet kryeqytetase. Në të 22-n, Dedgjonaj shënon golin e dytë për skuadrën e Partizanit, ndërsa 8 minuta më pas, Taullai shënon golin e 3-të. Një minutë më pas, Koka shënon golin e katërt dhe pjesa e parë mbyllet kështu me rezultatin 4-0, në favor të kryeqytetaseve.

Dhjetë minuta pas fillimit të pjesës së dytë, Begallo shënon golin e dytë personal dhe të 5-tin për skuadrën. Ndërsa, më pas, kanë shënuar edhe Bilali në minutën e 80-të, Nuhu në të 83-tën dhe Selja në të 87-ën. Ndeshja u mbyll kështu me rezultatin final 8-0 për vajzat e Partizanit. Ndërkaq, ndeshja tjetër e prapambetur mes Teutës dhe Skënderbeut, u mbyll në favor të durrsakeve, me rezultatin 10-0.

Një 3-golësh i Ndrelajt, e cila hapi ndeshjen me golin e saj në minutën e 4-t dhe më pas shënoi edhe në të 16-tën dhe atë të 29-ën. Kacorri dhe Malaj, me dygolëshat e tyre, si dhe Pucaj me një 3-golësh, i dhanë fitoren e madhe Teutës, që në çerekfinale do të gjejë përballë skuadrën e Tirana AS. Ndërkohë, në ndeshjen e parë çerekfinale mes Vllaznisë dhe Juban Danja, vajzat shkodrane fituan me rezultatin 7-0.

Zylfije Bajramaj hapi serinë e golave dhe kaloi skuadrën në epërsi në minutën e 9-të, teksa shënoi edhe dy gola të tjerë në minutat 45 dhe 84. Megi Doçi shënoi dy herë në portën e shkodraneve të Juban Danjës në minutat 32 dhe 73. Esmeralda Franja shënoi emrin e saj në këtë fitore, me një gol mjaft të bukur në minutën e 22-të, ndërsa Esi Lufo nga ana tjetër shënoi për Vllazninë në minutën e 51-të.

Vllaznia kështu bëhet ekipi i parë gjysmëfinalist i këtij edicioni të Kupës së Shqipërisë për femra.