ASNN – Shkodranet, fituese në fuqi të këtij trofeu, por dhe të titullit “kampion”, dje në finalen e “Elbasan Arenës” kanë mundur Apoloninë 3-0. Që në fillimin e ndeshjes, vajzat nga Shkodra mundohen që të vendosin diktatin në fushën e lojës, ku vijojnë të ushtrojnë presion në zonën kundërshtare. Mirëpo, përpos epërsisë territoriale, rastet e pastra mungojnë, duke mos dhënë për asnjë çast iluzionin e golit.
Fillimisht është Gjegji, ajo që provon në dy raste kuadratin e portës së Mullait, por goditja ka qenë pa shumë pretendime dhe sfera është kontrolluar pa vështirësi. Minutat ecin dhe goli nuk duket gjëkundi, edhe pse në fushë ka vetëm një skuadër, e cila mundohet të shtyjë përpara, ajo e Vllaznisë. Fieraket i gëzohen faktit që nuk pësojnë gol dhe në fraksionin e parë të lojës ia dalin ta mbajnë të paprekur rrjetën.
Edhe pjesë e dytë e lojës nis ashtu si mbaroi e para, me Vllazninë që sulmon. Por në ndryshim nga 45 minutat e para, gjithçka nis me gol të shpejtë. Është Doçi që fillimisht godet traun e portës fierake dhe në aksionin që vazhdon topi rikthehet në këmbët e saj e lojtarja nuk gabon në goditjen e dytë. 1-0 vetëm pas dy minutash lojë dhe tani shkodranet luajnë më lirshëm në fushë.
Në të 58-ën minutë është Jashari që shtyn një top në rrjetë, pas harkimit nga e djathta, duke dyfishuar kështu shumë shpejt shifrat. Apolonia duket sikur nuk ka më fuqi të luajë dhe lë shumë hapësira për kundërshtarët, të cilat trefishojnë shifrat me anë të një 11-metërshi. Prekje e topit me dorë në zonë nga fieraket dhe nga pika e bardhë është Doçi që nuk gabon në minutën e 75-të.
Nuk ka më histori, edhe pse ka 15 minuta të tjera lojë, me Vllazninë që fiton kështu Kupën e Shqipërisë në futboll për femra për herë të katërt.
VLLAZNIA – APOLONIA 3-0
Shënuese: Doçi 48’, 75’ (11-m.), Jashari 58’
E mërkurë, 22 shkurt 2017, ora 13:30
në Stadiumin “Elbasan Arena”
VLLAZNIA: Raxhimi, Lipa (Mustafa 76’), Bajraktari, Gjini, Franja, Koldashi (Gruda 62’), Jashari, Maliqi (Piranei 83’), Doçi, Muja, Gjegji (Kotarja 78’). Trajner: N. Leka.
APOLONIA: Mullai, Simoni (Gjoni 72’), Xhindole, Demiri, Çerkini (Saliaj 88’), Taullaj (Kostaj 87’), Doko, Kl. Goro (Muskaj 82’), Zarka, Ke. Goro, Levenaj. Trajner: A. Ymeraj.
GJYQTARË: O. Ferhataj, E. Pashaj (Patos), R. Malaj (Vlorë)
Kupa e Shqipërisë
Futboll – Femra
Libri i Artë i Fitueseve:
2009-2010 Tirana AS
2010-2011 Ada
2011-2012 Juban Danja
2012-2013 Juban Danja
2013-2014 Vllaznia
2014-2015 Vllaznia
2015-2016 Vllaznia
2016-2017 VLLAZNIA
