ASNN – Skënderbeu merr fitoren e parë, nuk ka surpriza nga Vllaznia e Apolonia. Java e katërt e Kampionatit Kombëtar të Futbollit të Femrave është zhvilluar këtë fundjavë. Një javë që u luajt pa ekipin e Tiranës, që bazuar në kalendarin e këtij sezoni ishte pushim. Kështu, ndeshja e parë e kësaj jave të katërt u zhvillua në Korçë, me ekipin e Skënderbeut që arriti fitoren e parë sezonale ndaj Lushnjes. Fillimisht ishin myzeqaret ato që kaluan në epërsi që në minutën e 4-t, me Gegën, ndërsa barazimi do të vinte në minutën e 8-të me Potomin.

Pjesa e parë do të mbyllej me shifrat 1-1, teksa në pjesën e dytë të lojës, Joana Niçku do të shënonte një dygolësh për juglindoret, duke vulosur fitoren 3-1, me korçaret që marrin kështu 3 pikët e para në kampionat. Ndërkaq, në sfidat e ditës së diel, nuk ka të papritura sa u përket dy pretendenteve kryesore, Vllaznia dhe Apolonia, që kanë marrë fitoret e radhës. Pas pushimit një javor, Vllaznia u rikthye në fushë, ku përballë kishte Atletik Klub, në derbin shkodran që u fitua nga kampionet në fuqi. 4-0 u mbyll kjo sfidë, me 2 gola të shënuar nga Megi Doçi, si dhe Klaudja Borçi dhe Xhulia An’Satler.

Në anën tjetër, Apolonia ka fituar në fushë të huaj ndaj Tirana AS, me rezultatin e thellë 0-14. Një fitore me vlerë 3 pikë për fieraket, që tregojnë kështu formën e mirë që po kalojnë në këtë sezon. Sakaq, Partizani ka marrë fitoren e radhës në kampionat, ku ka mundur me shifrat 4-1 Teutën. Një ndeshje mjaft e mirë e të kuqeve, që shënuan dy gola në pjesën e parë të lojës me Tabakun dhe Locën ndërsa me fillimin e pjesës së dytë të lojës, durrsaket ngushtuan rezultatin me Bushin. Megjithatë, kryeqytetaset shënuan edhe dy gola të tjerë në pjesën e dytë me Kokën dhe Qosen.

Duke marrë kështu 3 pikë dhe duke u ngjitur në vendin e katërt në kampionat. Sfida tjetër ishte ajo mes Murlanit dhe Kinostudios, një ndeshje mjaft e luftuar nga të dyja skuadrat që përfundoi me barazimin 3-3. Fillimisht ishin shkodranet ato të cilat zhbllokuan rezultatin me Vishkullin, teksa kryeqytetaset përmbysën rezultatin me golat e Lulaj dhe Torit. Me fillimin e pjesës së dytë, Murlani gjen sërish golin me Vasën, ndërsa Ndeme do të shënonte golin e tretë për Kinostudion në minutën e 57-të. Pak minuta para përfundimit të lojës, Vishkulli realizon golin e barazimit për Murlanin.

Me këtë barazim, skuadrat ndajnë nga një pikë në këtë javë të katërt. Më poshtë edhe renditja e skuadrave pas javës së 4-t:

Kampionati Kombëtar

i Futbollit – Femra

Java e 4-t

Të shtunën, 6 nëntor 2021:

Skënderbeu – Lushnja                    3-1

Të dielën, 7 nëntor 2021:

Tirana AS – Apolonia                       14-0

Vllaznia – Atletik Klub                      4-0

Murlani – Kinostudio                                    3-3

Partizani – Teuta                               4-1

Renditja

Nr.       Skuadra         Pikë

1. Apolonia        12
2. Vllaznia           9
3. Tirana               9
4. Partizani          9
5. Atletik Klub      4
6. Kinostudio       4
7. Skënderbeu    4
8. Murlani            4
9. Lushnja           3
10. Teuta   0
11. Tirana AS   0