ASNN – Kampionati Kombëtar i Futbollit për Femra ka mbyllur me sukses 4 javët e para të tij, teksa kjo e shtunë do të mirëpresë ndeshje mjaft të këndshme për publikun e futbollit të femrave. Derbi kryeqytetas, Tirana-Partizani do të ngrejë siparin e kësaj jave, me super sfidën që pritet me shumë kuriozitet nga tifozët e këtyre skuadrave. Ndeshja do të luhet në Kompleksin “Skënder Halili”, me Tiranën që do të jetë pritëse e kësaj sfide dhe që është në epërsi me fitoret e marra kundrejt të kuqeve që nga sezoni i kaluar.
Sfida do të nisë në ora 11:00, me të dyja skuadrat që do të tentojnë të marrin pikët maksimale. Nga ana tjetër, një sfidë tjetër që pritet me interes nga publiku do të luhet në Fier, me Apoloninë që do të presë në shtëpi kampionen në fuqi të Shqipërisë, Vllazninë, në një sfidë që ka sjellë gjithmonë emocione. Fieraket renditen të parat, me 3 pikë më shumë në tabelë, por me shkodranet që kanë një ndeshje më pak në garë. Ndeshja do të nisë nga ora 12:00, ku Apolonia do të tentojë të ruajë vendin e parë në renditje, ndërsa verioret do të shkojnë me synimin e tre pikëve.
Kjo javë rezervon një tjetër derbi në kryeqytet, ku Kinostudio do të luajë kundër Tirana AS, me këto të fundit që kanë 0 pikë në 3 ndeshje të zhvilluara. Kjo ndeshje do të luhet duke nisur nga ora 12:30 këtë të shtunë në Tiranë. Ndërkaq, drejt Lushnjes do të udhëtojnë vajzat e Murlanit, ku do të luajnë përballë myzeqareve, të cilat pësuan një humbje fundjavën e shkuar dhe do të kërkojnë të bëjnë mirë në shtëpi, me sfidën që do të nisë nga ora 12:30 në Lushnje. Ditën e diel në Durrës do të luhet edhe sfida e pestë dhe e fundit e kësaj jave, mes Teutës dhe Skënderbeut.
Korçaret morën një 3-pikësh me vlerë fundjavën e shkuar në vizitën e Lushnjes që i rendit në vendin e 7-të me 4 pikë, ndërsa bregdetaret ende nuk kanë marrë pikën e parë në këtë sezon të ri. Ndeshja do të luhet duke nisur nga ora 14:00.
Kampionati Kombëtar
i Futbollit – Femra
Java e 5-të:
Të shtunën, 13 nëntor 2021:
Tirana – Partizani (11:00)
Apolonia – Vllaznia (12:30)
Kinostudio – Tirana AS (12:30)
Lushnja – KF Murlani (12:30)
Të dielën, 14 nëntor 2021:
Teuta – Skënderbeu (14:00)
