ASNN – Kupa e Shqipërisë në futboll për femra nuk prodhoi surpriza, sepse Vllaznia, e cila dominon prej disa vitesh topkëmbën e femrave në Shqipëri, ia doli të triumfojë në finale përballë Apolonisë, duke fituar trofeun e parë për këtë vit. Ky suksesi i 6-të i shkodraneve në Kupën e Shqipërisë, por duhet thënë se e kanë fituar 5 herë në 6 vjetët e fundit.
Në këtë finale, e cila u luajt në stadiumin “Elbasan Arena”, vajzat shkodrane mundën Apoloninë e Fierit me rezultatin e pastër e të thellë 3-0. Vajzat nga Fieri rezistuan vetëm në pjesën e parë, por jo duke e ruajtur të paprekur portën e tyre, pasi shkodranet gjetën golin me anë të Bajraktarit pikërisht në këtë pjesë. Kurse në fraksionin e dytë të ndeshjes nisi “vallëzimi” i skuadrës shkodrane.
Dhe, bashkë me të, edhe ardhja e golave të fitores së plotë e të merituar. Megi Doçi, e përhershmja e suksesit të Vllaznisë, shënoi golin e dytë me 11-metërsh, ndërsa golin e 3-të e shënoi Ejdena Mustafaj. Ishte një fitore e merituar për Vllazninë, e cila konfirmoi dhe një herë se nuk ka rivale në futbollin e femrave dhe skuadrat e tjera vetëm dorëzohen para saj.
Sidoqoftë, për Apoloninë ishte sukses që arriti deri në finale dhe kjo duhet parë si motivuese dhe njëherësh si punë e mirë nga ana e skuadrës fierake, e cila mund të fuqizohet në muajt dhe vitet e ardhshme për të bërë një skuadër cilësore.