ASNN – Skënderbeu dorëzohet për herë të dytë radhazi në fazën e dytë të kampionatit, ndërsa skuadra vazhdon të luajë pa portiere. Fitorja e fierakeve është bindëse. Në javën e 12-të të Kampionatit Kombëtar të Futbollit për Femra, Skënderbeu ka pësuar humbjen e dytë radhazi, teksa dje, në shtëpinë e korçareve, ka triumfuar Apolonia, që fiton bindshëm 0-5. Në fakt 45 minutat e para kanë qenë më shumë se të barabarta, me një lojë pa raste për të dy ekipet.

Duhet përmendur fakti se Skënderbeu vijon në këtë fazë të dytë të mos ketë një portiere, por rolin e “gardianes” e bën një mbrojtëse e ekipit. Sigurisht një minus më shumë për korçaret, që dje pritej të reagonin ndaj fierakeve, por që nuk kanë mundur ta bëjnë një gjë të tillë pasi të pesë golat e pësuar kanë ardhur nga gabimi i portieres. Ndërkohë që gjithë pjesa e parë kaloi pa asnjë rast në portat përkatëse, pikërisht në minutën e parë shtesë të kësaj pjese, gjyqtarja Rusta nga Elbasani jep një goditje dënimi diagonal në krahun e djathtë të sulmit fierak.

Është Zarka, që gjuan dhe kroson njëkohësisht, dhe topi përfundon në rrjetë falë gabimit të portieres Zere. Kaq mjafton për fraksionin e parë të ndeshjes. Në pjesën e dytë vendaset ndryshojnë në lojë, por kur pritej goli i barazimit është Ke. Goro që, pas një gabimi të mbrojtjes vendase, shënon golin e dytë dhe që duhet thënë se ka shtangur korçaret. Shumë shpejt, më saktë tre minuta më vonë, do të vinte edhe goli i tretë i mikeve, këtë herë me anë të Kl. Goros, që pas një gabimi të radhës të portieres së Skënderbeut çon shifrat në 0-3.

Në të 61-ën minutë do të vinte edhe goli i katërt, teksa Levanaj, nga largësia, e kalon topin në mes të duarve të portieres vendëse dhe serinë e golave e mbyll Zarka në minutën e 70-të, që shënon golin e pestë dhe të dytin individual për të në këtë takim. Përfundimisht Apolonia fiton 0-5 në aneksin e stadiumit “Skënderbeu”, duke ruajtur në këtë mënyrë vendin e tretë në renditje, ndërkohë që korçaret pa portiere do ta kenë absolutisht të vështirë në këtë fazë të dytë.

Skënderbeu – Apolonia                              0-5

Shënuese: Zarka 45+1’, 70’, Ke. Goro 56’,

Kl. Goro 59’, Levanaj 61’

Skënderbeu: Zere, Kasa, Zizolli, M. Niçku (Muçollari 46’), Shkëmbi, Popa, Morava (Berberi 66’), Myrtollari, Qylalli, J. Niçku, Kullira. Trajner: S. Lako

Apolonia: Hunçi (Mullai 76’), Demiri, Xhindole, Tahiri (Muskaj 71’), En. Çekaj (El. Çekaj 77’), Kl. Goro, Doko (Ferati 76’), Levanaj, Kostaj, Zarka (Saliaj 71’), Ke. Goro. Trajner: A. Ymeraj

Gjyqtarë: E. Rusta, E. Danaj, E. Kume (Elbasan)