ASNN – Në vijim të njoftimit të bërë publik të enjten pasdite nga Presidenti i saj, Armand Duka, Federata Shqiptare e Futbollit (FSHF) ka dalë me njoftim të premten paradite, duke zbuluar se kush përfiton nga paketa financiare që ajo ka miratuar për komunitetin e futbollit në vend. Në njoftimin e së premtes sqarohet se sa do të përfitojnë klubet e Kategorisë Superiore, gjyqtarët dhe zyrtarët e ndeshjeve.
Por ka edhe nga ata që përfitojnë gjysmë page, nëse janë të angazhuar njëkohësisht në punë të tjera. Në paketën financiare të FSHF-së nuk parashikohet ndihmë për klubet që janë në administrimin e bashkive, që normalisht do të paguhen nga bashkitë përkatëse, përmes fondeve që ata i kanë miratuar më parë. Përjashtim ka bërë këtu klubi i Vllaznisë, që është i Bashkisë së Shkodrës, por është i vetmi që nuk ka sponsor.
Të enjten, Komiteti Ekzekutiv i organizmit që qeveris futbollin në vend, vendosi të mbështesë futbollin shqiptar në një periudhë të pazakontë kur Shqipëria është paralizuar për shkak të virusit “Covid-19”. Ky vendim iu përcoll profesionistëve të futbollit të enjten nga Presidenti Armand Duka.
Ai theksoi se kjo masë përfshin periudhën 15 mars-15 prill, dhe në rast se ndalimi i të gjitha veprimtarive do të vijojë, paketa do të shtrihet edhe për periudhën 16 prill-15 maj 2020. Por cilat janë konkretisht kategoritë që përfitojnë? Sipas njoftimit të FSHF-së, të shpallur të premten paradite në faqen e saj zyrtare në Internet, përfitojnë futbollistët e Kategorisë Superiore dhe stafet, pra çdo punonjës i siguruar i tyre.
Po kështu përfitojnë të gjithë ata punonjës të futbollit që nuk kanë të ardhura të tjetra marrin pagesën e plotë 30 mijë lekësh të rinj, anëtarë të stafeve të klubeve të cilët janë të angazhuar me kohë të pjesshme, përfitojnë gjysmën e pagesës, të gjithë trajnerët e moshave që nuk janë në një punë tjetër marrin pagesën e plotë dhe trajnerët e moshave që janë të punësuar në punë tjetër përfitojnë gjysmën e pagesës.
Po kështu, përfitojnë të gjithë gjyqtarët që nuk janë në një punë tjetër do të marrin pagesën e plotë dhe klubet e kampionatit të femrave. Në mbyllje, njoftimi i Federatës Shqiptare të Futbollit (FSHF) sqarojnë se klubet që varen nga bashkitë nuk përfitojnë nga kjo pagesë, çka pritet të shkaktojë mjaft pakënaqësi në komunitetin e futbollit, për shkak se pritet të cilësohet si diskriminim midis klubeve.
