ASNN – Ka nisur në Korçë kampionati më i ri i futbollit amator “FSHF Sunday League Albania 11vs11”. Kjo është risia e radhës e Federatës Shqiptare të Futbollit që merr udhë këtë sezon me 18 skuadra, të krijuara rishtazi nga futbollistë amatorë, që janë regjistruar dhe që kanë nisur tashmë garën. Ndeshjet luhen me dy pjesë nga 30 minuta secila, drejtohen nga gjyqtarë profesionistë dhe të pranishëm në çdo takim janë mjekët sportiv, ambulanca dhe shërbim të sigurisë fizike.
Në këtë veprimtari, çdo ekip, që ka nga 25 lojtarë të regjistruar, mund të kryejë deri në 5 zëvendësime gjatë një ndeshjeje. Kampionati i zonës rajonale të Korçës ka 4 grupe, dy nga të cilat kanë nga 5 ekipe dhe dy nga 4 ekipe. Do të luhet me ndeshje vajtje-ardhje dhe dy ekipet e renditura të parat në grup do të kualifikohen për në fazën e “play-off”-eve, përmes të cilës do të shpallet edhe “kampionia” e zonës rajonale të Korçës.
I pranishëm në ceremoninë e hapjes së këtij edicioni ishte edhe Drejtori i Futbollit Amator në FSHF, Jurgen Demneri, i cili shpjegoi rëndësinë e masivizimit të futbollit amator në Shqipëri, si edhe u uroi suksese të gjitha skuadrave pjesëmarrëse. Në aneksin e Stadiumit “Skëndërbeu” të Korçës janë luajtur këtë të hënë dy ndeshjet e para të këtij kampionati, ndërkohë që do të luhen dy ndeshje në ditë nga e hëna në të enjte.
Në sfidën e parë, Helzag mundi Sportin me rezultatin minimal 1-0, kurse në sfidën e dytë të mbrëmjes Tona u mposht nga Pirgu me rezultatin 0-2. Në ditët në vazhdim do të luhen edhe ndeshjet e tjera. FSHF synon që pas Korçës ky kampionat i ri të shtrihet edhe në zonat e tjera rajonale të Shqipërisë.
“FSHF-Sunday League Albania 11 X 11”
Java e parë:
Të hënën, 20 shtator 2021:
Helzag – Sporti 1-0
Tona – Pirgu 0-2
Të martën, 21 shtator 2021:
Tresteniku – Bulgareci ora 20:00
Voskopi – Ravoniku ora 21:00
Të mërkurën, 22 shtator 2021:
Qaja – Bracanji ora 20:00
Iron Sharp – 28 Nëntori ora 21:00
Të enjten, 23 shtator 2021:
Voskopoja – Leminoti ora 20:00
Dvorani – Francezët ora 21:00
