ASNN – Miqësorja para grumbullimit, ekipet kombëtare të Nën-18 & Nën-19-vjeçarëve testojnë 27 lojtarë. Kështu, dy kombëtaret kuqezi të këtyre grupmoshave kanë zhvilluar këtë të mërkurë një miqësore në kuadër të përgatitjeve për dy ndeshjet miqësore ndaj përfaqësueses së Nën-19-vjeçarëve të Izraelit, që do të luhen më 3 dhe 5 shtator 2021.
Ndeshjen e luajtur në Kompleksin “Internacional” në Pezë-Helmes, trajneri i Kombëtares së Nën-19-vjeçarëve, Armando Cungu, e nisi me këtë formacion: Ortelio Biba, Xhoel Vrapi, Enea Borova, Alesio Stafa, Enes Papa, Bradli Buci, Mario Jushi, Rubien Goga, Frenki Shahaj, Kevin Leka, dhe Ilir Gjuzi. Ndërsa gjatë ndeshjes u aktivizuan edhe Augen Hasani, Ertigen Shehu dhe Envi Bocka.
Ndërsa përballë tyre trajneri i Kombëtares së Nën-18-vjeçarëve, Ardi Behari, e nisi sfidën duke hedhur në fushë këtë 11-she: Endri Dema, Orgest Merkaj, Erest Lamellari, Blerim Qokaj, Armand Hasa, Danilo Bajraktari, Orgi Cena, Ersi Matmuja, Alvi Mezani, Muco Boci, Redi Kacanolli dhe Mikael Rakipaj e Sajdi Thana, të cilët hynë në fushë gjatë ndeshjes si zëvendësues.
Ndeshja përfundoi me fitoren 3-2 të formacionit të Nën-19-vjeçarëve me 2 gola të shënuar nga Gjuzi dhe një nga Goga. Për 18-vjeçarët shënoi Thana, teksa Vrapi shënoi autogol në portën e tij. Në fakt, të gjithë lojtarët e ftuar në këtë miqësore kanë qenë pjesë e grumbullimeve të vazhdueshme të Kombëtares së Nën-19-vjeçarëve dhe janë pjesë e planeve të ekipit kuqezi.
Kuqezinjtë e drejtuar nga trajneri shkodran, Cungu, që po përgatiten edhe për pjesëmarrjen në fazën eliminatore të Evropianit të grupmoshës së Nën-19-vjeçarëve, shorti i ka vendosur në Grupin 7, së bashku me Francën, Serbinë dhe Maqedoninë e Veriut. Dhe ndeshjet e këtij grupi do të luhen në Shqipëri, në datat, 10, 13 dhe 16 nëntor 2021.
Kuqezinjtë do të zhvillojnë një grumbullim njëjavor para dy miqësoreve me Izraelin me qëllim harmonizimin e skuadrës në prag të ndeshjeve eliminatore që do të kenë një muaj më pas. Këtë vit, Kombëtarja e Nën-19-vjeçarëve ka zhvilluar disa përzgjedhje dhe grumbullime, ku trajneri Cungu ka pasur mundësi të vëzhgojë një pjesë të madhe të lojtarëve që luajnë brenda dhe jashtë vendit, si dhe zhvilloi dy ndeshje miqësore me Nën-19-vjeçarët e Kosovës.
