ASNN – Për herë të parë dhe, në mënyrë të pazakonte sepse ndodhemi në mes të sezonit, nga ana e organizmit që qeveris futbollin shqiptar, FSHF-ja, është mësuar se do të zhvillohet Kupa e Shqipërisë për moshat (Kategoria Superiore) për grupmoshat Nën-17 dhe Nën-19-vjeçarëve.
Sektori i Garave në Federatën Shqiptare të Futbollit, ka futur në kalendarin e veprimtarive të këtij viti edhe një veprimtari e tillë. Është hera e parë, që kjo lloj veprimtarie zhvillohet për ekipet e moshave. Ajo do të zhvillohet me sistem grumbullimi në Kamëz, në Yrshek dhe në Pezë.
Faza e parë do të zhvillohet më datë 23 dhe 24 janar, me pjesëmarrjen e 16 skuadrave për secilën kategori (Nën-17 dhe Nën-19-vjeçarët). Federata ka njoftuar nëpërmjet faqes së saj zyrtare në Internet, se, në këtë veprimtari do të aplikohet sistemi i eliminimit me ndeshje direkte, deri në përcaktimin e 4 gjysmëfinalistëve për çdo kategori.
Këto skuadra, do të ndeshen në ditët në vazhdim për të përcaktuar finalistët dhe fituesit e Kupës. Kupa e Shqipërisë (të cilës gabimisht FSHF i referohet si qëmoti, “Kupa e Republikës), është veprimtaria e dytë për nga rëndësia pas Kategorisë Superiore të Kampionatit Kombëtar të Futbollit të Nën-17 dhe Nën-19-vjeçarëve.
